Ընդդիմադիր «Հայաստան» դաշինքը, հիմնվելով Դոնթի բանաձեւի վրա, արդեն հինգերորդ անգամ Արթուր Ղազինյանին առաջադրել է պաշտպանության եւ անվտանգության հարցերի մշտական խորհրդարանական հանձնաժողովի նախագահի տեղակալի պաշտոնումմ: Այս մասին սեպտեմբերի 28-ին ԱԺ-ում պաշտպանության եւ անվտանգության մշտական հանձնաժողովի արտահերթ նիստին փոխնախագահի ընտրության քննարկման ժամանակ ասաց հանձնաժողովի նախագահ, իշխող «Քաղաքացիական պայմանագիր» կուսակցության պատգամավոր Անդրանիկ Քոչարյանը:
Քոչարյանը նշեց, որ ընդդիմությունը` ի դեմս «Հայաստան» դաշինքի, կարող էր քայլ առաջ անել եւ վերջապես առաջադրել մեկ այլ թեկնածուի:
«Ղազինյանը հայտարարեց, որ նա պետք է առաջադրի իր թեկնածությունը, եթե հիշողությունս ինձ չի դավաճանում, 40-րդ անգամ»,-ասաց Քոչարյանը:
Քննարկումը հերթական անգամ ընթանում էր փոխադարձ քննադատության մթնոլորտում: Բանն այն է, որ «Հայաստան» դաշինքի պատգամավոր Գեղամ Մանուկյանն առաջարկեց ընդլայնել հանձնաժողովի նիստերի օրակարգը: Ըստ պատգամավորի՝ հանձնաժողովը, ըստ էության, պետք է այլ՝ ոչ պակաս կարեւոր խնդիրներ ունենա, որոնք արժանի են ուշադրության: Այդպես, նա հիշեցրեց Ադրբեջանի հետ սահմանին լարված իրավիճակի եւ շփման գծում համապատասխան պաշտպանական դիրքերի բացակայության մասին՝ չնայած նրան, որ իշխանությունները բազմիցս հայտարարել են այս ուղղությամբ տարվող աշխատանքների մասին:
«Այսօր մեզ համար ամենաքիչ կարեւոր հարցը հանձնաժողովի փոխնախագահի ընտրությունն է: Առնվազն՝ ընդդիմությունը ներկայացնող հանձնաժողովի անդամների համար: Այս ընթացքում կարելի էր նախագիծ ներկայացնել, ըստ որի խորհրդարանական հանձնաժողովի նախագահի բացակայության դեպքում նրա լիազորությունները ժամանակավորապես կփոխանցվեին իշխող «Քաղաքացիական պայմանագիր» կուսակցության պատգամավորներից մեկին»,- ասաց Մանուկյանը:
Արթուր Ղազինյանն իր հերթին առաջարկեց ենթահանձնաժողով ստեղծել, որը պետք է ուսումնասիրի Հայաստանի վարչապետ Նիկոլ Փաշինյանի կողմից անցած տարվա հոկտեմբերի 7-ին Ղարաբաղում ռազմական գործողությունները դադարեցնելուց հրաժարվելու հարցը:
«Մասնավորապես, հայտնի դարձավ, որ Ռուսաստանի Դաշնությունը հոկտեմբերի 7-ին հանդես է եկել պատերազմը դադարեցնելու առաջարկով: Այդ հայտարարությունը երբեք չի հերքվել որեւէ մեկի կողմից: Ցանկանում եմ նշել, որ հոկտեմբերի 7-ի դրությամբ, թերեւս՝ պաշտոնական տվյալներով, մենք ունեցել ենք 356 զոհ: Այսօր մենք ունենք մոտ 3900 զոհ: Եթե պատերազմը դադարեցվեր հոկտեմբերի 7-ին, մենք 3600-ով ավելի շատ մարդ կունենայինք»,- շեշտեց թեկնածուն՝ հավելելով, որ զոհերի հարազատներն ու ծնողներն իրավունք ունեն պարզել Փաշինյանի կայացրած ճակատագրական որոշման հանգամանքները:
Ղազինյանի եւ Մանուկյանի առաջարկներին կողմ հանդես եկավ հանձնաժողովի անդամ, «Պատիվ ունեմ» ընդդիմադիր դաշինքի պատգամավոր Տիգրան Աբրահամյանը: Նա առաջարկեց բացատրություններ տալու համար խորհրդարան հրավիրել նաեւ ՊՆ բարձրաստիճան ներկայացուցիչներին: Պատգամավորին, մասնավորապես, հետաքրքրում է բանակում բարեփոխումներ իրականացնելու գործընթացը, որոնց մասին նույնպես հաճախ է խոսվում:
Ինչ վերաբերում է հիմնական հարցին, այն է՝ պաշտպանության եւ անվտանգության հարցերի մշտական խորհրդարանի հանձնաժողովի փոխնախագահի պաշտոնում Արթուր Ղազինյանի թեկնածության քննարկմանը, այստեղ բեկում հերթական անգամ տեղի չունեցավ:
Արդյունքում, Ղազինյանը լքեց այն սենյակը, որտեղ ընթանում էին քննարկումները: Նրան միացան նրա համակիրները «Հայաստան» դաշինքից: Թեկնածուի եը նրա գործընկերների հեռանալն ուղեկցվեց տեղերից բղավոցներով: Այդպես, հանձնաժողովի ղեկավար Անդրանիկ Քոչարյանը մեղադրեց Ղազինյանին «խրամատներից փախչելու» մեջ: Խորհրդարանական հանձնաժողովի նախագահի խոսքով՝ նման վարքագիծն անընդունելի է: Ըստ Քոչարյանի՝ դա անհարգալից վերաբերմունք է ներկաների, մասնավորապես՝ իշխող մեծամասնության ներկայացուցիչների նկատմամբ:
Ղազինյանն ասաց, որ ամեն ինչ չափ ունի, եւ ինքը քննարկումը շարունակելու իմաստ չի տեսնում, քանի որ անհրաժեշտ եւ կարեւոր ամեն ինչ արդեն բազմիցս հնչեցվել է:
Ինչեւէ, սակայն Ղազինյանի թեկնածությունը կրկին չհաստատվեց: Հանձնաժողովի անդամները՝ ի դեմս իշխող մեծամասնության պատգամավորների, քվեարկեցին թեկնածուի բացակայության պայմաններում: Այդպիսով, խորհրդարանական ընդդիմությունը՝ ի դեմս «Հայաստան» դաշինքի, ստիպված կլինի ներկայացնել նոր թեկնածու: Նշենք, որ պաշտպանության եւ անվտանգության հարցերի մշտական խորհրդարանական հանձնաժողովում ընդդիմությունը ներկայացված է ընդամենը 4 պատգամավորով: Նրանցից երեքը «Հայաստան» խմբակցությունից են, եւս մեկը՝ «Պատիվ ունեմ» դաշինքից: