Շրի Լանկայի դատախազությունը մեղադրանք է առաջադրել 2019 թվականի Զատկի կիրակի տեղի ունեցած ահաբեկչական գործողությունների կազմակերպչին, ինչպես նաեւ 24 մեղադրյալների, ովքեր մեղսակից են համարվում կղզում տեղի ունեցած ամենասարսափելի ահաբեկչությանը, հայտնել է AFP-ն:
Ապրիլի 21-ին երեք եկեղեցիների եւ երեք շքեղ հյուրանոցների վրա հարձակումների արդյունքում մոտ երեք հարյուր մարդ զոհվեց` այդ թվում տասնյակ օտարերկրյա քաղաքացիներ:
Դատախազությունը կասկածյալների դեմ ավելի քան 20 հազար մեղադրանք է առաջադրել, որոնցից երեքին ԱՄՆ արդարադատության նախարարությունն արդեն մեղադրել է ահաբեկչության մեջ:
Դատախազները դատարանին հայտնել են, որ ԱՄՆ-ի եւ Ավստրալիայի դատաբժշկական փորձագետները օգնել են քննիչներին հայտնաբերել հարձակումների համար պատասխանատու ութ հոգուց բաղկացած մահապարտների ջոկատը:
Շրի Լանկայի իշխանությունները մեղադրել են պարագլուխ Մուհամեդ Նաուֆարին՝ մահապարտ ահաբեկիչներին ոգեւորելու եւ «Իսլամական պետություն» խմբավորման անդամ լինելու մեջ:
Նախկին ոստիկանապետ Պուջիթ Ջայասունդարան եւ Պաշտպանության նախարարության բարձրաստիճան պաշտոնյա Հեմասիրի Ֆերնանդոն նույնպես առանձին դատական հետապնդման են ենթարկվում անգործության համար՝ հետախուզության՝ ԻՊ-ի հավանական հարձակման վերաբերյալ նախազգուշացումների հետ կապված: