Փաստաբանական 25 տարվա գործունեության ընթացքում ես չեմ հանդիպել մի երեւույթի, երբ կողմին զրկում են տարրական իրավունքներից, եւ դատավորը նիստից նիստ հանգիստ տոնով ասում են, որ «դուք հնարավորություն ունեիք ծանոթանալու նյութերին» եւ «նիստը շարունակվում է, անցնում ենք հաջորդ փուլ»: Այս մասին լրագրողների հետ զրույցում հայտարարեց նախկին փոխվարչապետ, այժմ պատգամավոր Արմեն Գեւորգյանի փաստաբան Լուսինե Սահակյանը՝ մեկնաբանելով դատավոր Աննա Դանիբեկյանի գործողությունները:
Փաստաբանի խոսքով՝ դատարանի առջեւ ընդհանրապես արդարադատություն իրականացնելու կամ մարդու իրավունքները պաշտպանելու խնդիր դրված չէ: Հակառակը, խնդիրն առաջ գնալն է, եւ այդ ճանապարհին դատարանը ոչնչի առջեւ կանգ չի առնում:
Փաստաբանը դատարանի կողմից կիրառված պատժամիջոցն ակնհայտ անօրինական համարեց: «Բայց դա պաշտպանության կողմին կանգնեցնել չի կարող,- վստահեցրեց Սահակյանը:- Դատախազի դիրքորոշումը եւս ափսոսանքի է արժանի: Նրա առջեւ եւս խնդիր է դրված հասնել վերջնական դատական ակտի: Կարծում եմ՝ այն արդեն գրված է, մնում են «ֆորմալությունները»: Մենք չենք պատրաստվում ջուր լցնել նրանց ջրաղացին: Դատավոր Դանիբեկյանը պարտավոր է տրամադրել նյութերը եւ կանի դա: Նա պարտավոր է ժամանակ տրամադրել, եւ նա դա կանի: Դատարանը մեկ նպատակ ունի՝ անօրինական դատական ակտի ընդունումը: Մենք նրան չենք օգնի: Թող որքան ուզում է պատժամիջոցներ կիրառի»:
Նիստերի ժամանակացույցը փոխել հրաժարվելու կապակցությամբ փաստաբանը նշեց, որ դատարանը չի հարգում գործընկերներին: «Իրեն արտոնյալ է համարում: Դատախազները նույն կարծիքին են իրենց մասին: Բայց մեկ այլ դատարան այդպես չի կարծում, և ոչ էլ դատախազները: Դատավոր Դանիբեկյանն անում է ամեն ինչ, որպեսզի Արմեն Գեւորգյանը մնա առանց պաշտպանության: Բայց արդյունքում կպարզվի, որ դատարանի որոշումն անօրինական է»,- նախազգուշացրեց փաստաբանը: