Հոկտեմբերի 18-ին Երեւանում բացվեց ռուս-հայկական ութերորդ միջտարածաշրջանային ֆորումը: Միջոցառումը, որը կշարունակվի հոկտեմբերի 19-ին, կազմակերպել են Ռուսաստանի Դաշնության տնտեսական զարգացման նախարարությունը եւ Հայաստանի տարածքային կառավարման և ենթակառուցվածքների նախարարությունը:
Լիագումար նիստին կմասնակցեն Ռուսաստանի տնտեսական զարգացման նախարար Մաքսիմ Ռեշետնիկովը եւ Հայաստանի տարածքային զարգացման եւ ենթակառուցվածքների նախարար Գնել Սանոսյանը: Ֆորումի շրջանակներում կկայանա նաեւ Ռուսաստանի արտահանման կենտրոնի գործարար առաքելությունը` մոտ 100-150 ձեռներեցների մասնակցությամբ:
Ֆորումի հարթակում տնտեսության, արդյունաբերության, կրթության եւ մշակութային եւ պատմական զբոսաշրջության բնագավառում ռուս-հայկական համագործակցության զարգացման վերաբերյալ կլոր սեղանների շարք կանցկացվի: Զուգահեռ նիստերին հրավիրված են մասնակցելու Ռուսաստանի եւ Հայաստանի մարզերի ղեկավարներ, համապատասխան նախարարությունների եւ գերատեսչությունների, Եվրասիական տնտեսական միության, գործադիր եւ օրենսդիր մարմինների, հասարակական կազմակերպությունների, գործարար եւ փորձագիտական համայնքների ներկայացուցիչներ:
Ֆորումի մասնակիցները հատուկ ուշադրություն կդարձնեն Ռուսաստանի եւ Հայաստանի բնակչության բարեկեցության բարելավման նպատակով առեւտրային եւ ներդրումային համագործակցության ակտիվացման համատեղ միջոցառումներին: Բացի այդ, նախատեսվում է քննարկել լուծումները, որոնք ուղղված են բիզնեսի վարման համար բարենպաստ պայմանների ստեղծմանը եւ երկու երկրների տնտեսական աճի արագացմանը անկումից հետո կորոնավիրուսային համավարակի ֆոնին:
Ռուս-հայկական միջտարածաշրջանային համաժողովներն անցկացվում են 2011 թվականից՝ նպատակ ունենալով ընդլայնել համագործակցությունը երկու պետությունների տարածքային միավորների միջեւ: