Երևանի կենդանաբանական այգին հյուրընկալել էր հաշմանդամություն և քրոնիկ հիվանդություններ ունեցող, սոցիալապես անապահով երեխաներին։ Այս մասին NEWS.am-ը տեղեկանում է Երեւանի քաղաքապետարանից:
«Երևանի կենդանաբանական այգին մաս է կենդանաբանական այգիների մի մեծ ընտանիքի, որոնք ամեն տարի իրականացնում են այս միջոցառումը և տոնում ներառականությունը: Մենք հյուրընկալեցինք շուրջ 100 երեխայի և ընդհանուր առմամբ մոտ 300 մասնակցի: Նրանցից շատերը այստեղ առաջին անգամ էին: Հաջորդ տարի նախատեսում ենք մի շարք նոր նախաձեռնություններով հանդես գալ: Իսկ այս միջոցառումն իրականացվեց բարերարների և կամավորների շնորհիվ»,-նշում է Երևանի կենդանաբանական այգու տնօրենի ժամանակավոր պաշտոնակատար Արևիկ Մկրտչյանը:
Շուրջ 35 երկրների ավելի քան 300 կենդանաբանական այգիներում անցկացվող ամենամյա միջոցառումն սկիզբ է առել 1996 թվականին՝ Նիդերլանդների Ռոտերդամ քաղաքում: 2014-ից ի վեր, Երևանի քաղաքապետարանի հետ համագործակցությամբ, նախաձեռնությանը միացել է նաև Երևանի կենդանաբանական այգին:
Երեխաները ոչ միայն զբոսնեցին այգու տարածքում, այլև մասնակցեցին խաղերի ու մրցույթների՝ նկարեցին, զբաղվեցին կավագործությամբ, երգեցին, համերգներ լսեցին ու խրախուսվեցին: Այգու բոլոր ծառայությունները նրանց համար անվճար էին:
«Երազանքի երեկոն» գունավորեց երեխաների մեկ օրը: Երևանի քաղաքապետարանն ու Կենդանաբանական այգին մտադիր են միջոցառումների օրացույցը լրացնել այդպիսի նախաձեռնություններով:
