Հայկական լեռնաշխարհի 2-րդ ամենախոշոր լիճ հանդիսացող Վանը տեղումների պակասի պատճառով շարունակում է չորանալ։
Թուրքական Gazeteduvar կայքի փոխանցմամբ՝ Վանա լճի մակարդակի իջեցումը շարունակում է անհանգստացնել բնապահպաններին։
Արբանյակային լուսանկարները 2019 եւ 2021 թվականների միջեւ լուրջ մտահոգություններ են առաջացրել։ Վանա լճի որոշ հատվածներում ջուրը մինչեւ 10 կմ հետ է քաշվել։
Վանի Հարյուրամյա համալսարանի դասախոսներից Մուսթաֆա Աքքուշը ուշադրության է հրավիրել այն հանգամանքի վրա, որ Վանա լճի մակարդակի իջեցումը վտանգում է լճի միակ ձկնատեսակ տառեխի գոյությունը, քանի որ տառեխները ձվադրման համար լճից դուրս են գալիս դեպի գետերի, իսկ մակարդակի իջնելու եւ գետերի նոսրանալու հետեւանքով չեն կարողանում ժամանակին ձվադրումներ իրականացնել։