«Միջանցքային» տրամաբանությամբ խոսակցություններն էլ ավելի են խորացնում մեր տարածաշրջանում տիրող թշնամական ու լարված մթնոլորտը։ Այս մասին հոկտեմբերի 27-ին ՀՀ Ազգային ժողովի նիստում կառավարության ժամին ասաց հանրապետության վարչապետ Նիկոլ Փաշինյանը՝ խոսելով հաղորդակցության ուղիների բացման մասին։
Վարչապետը հիշեցրեց, որ 2020 թվականի նոյեմբերի 9-ի եռակողմ հայտարարությունը պահանջում է հաղորդակցությունների ապաշրջափակում։
«Հայաստանը լիովին աջակցում է այս գաղափարը։ Տվյալ խնդրի լուծումը որոշակի երաշխիքներ կստեղծի տարածաշրջանում խաղաղության եւ անվտանգության ապահովման համար։ Պաշտոնական Երեւանը հարցին մոտենում է հենց այս տեսանկյունից եւ հենց այս ընկալմամբ»,- ընդգծեց Փաշինյանը։
Բացի այդ, ըստ նրա, այժմ քննարկվում է ապագա բեռնափոխադրումների երթուղիների հարցը։