Կապիտալ ծախսերի չկատարումը կարող է խանգարել Հայաստանի տնտեսական աճին։ Այս մասին ԱԺ նիստում 2022թ․ պետբյուջեի նախագծի քննարկման ժամանակ ասաց ԿԲ նախագահ Մարտին Գալստյանը։
Նրա խոսքով՝ Հայաստանում 2022թ․ կշարունակի արագ տեմպերով վերականգնվել ապրանքների եւ ծառայությունների ներքին պահանջարկը։
«Պահանջարկի վրա հիմնականում ազդելու է պետական կապիտալ շինարարությունը, որի ծավալն այս տարվա համեմատ պետք է ավելանա։ Կարեւոր է կապիտալ ծախսերը կատարել այնպես, ինչպես նախատեսված է։ Եթե դա տեղի չունենա, ապա մասնավոր ներդրումները, հետեւաբար միջնաժամկետ հեռանկարում տնտեսական աճի ցուցանիշները կարող են ավելի ցածր լինել, քան սպասվում էր»,-պարզաբանեց Գալստյանը։