Տեղեկությունը, որ հանդիպման ընթացքում Սյունիքի համայնքապետները դեմ չեն եղել Սյունիքով միջանցք տրամադրելուն, սուտ է։ Այս մասին NEWS.am-ի հետ զրույցում ասաց Գորիսի փոխքաղաքապետ Կարեն Քոչարյանը։
«Ես, որպես Գորիսի համայնքապետի տեղակալ, Առուշ Առուշանյանի ջոկատի հրամանատարի տեղակալ, ասում եմ, որ տեղեկությունն ամբողջությամբ սուտ է։ Առուշանյանը, թեև ազատության մեջ չէ, սակայն պատրաստ է կանգնել բանակի կողքին և իր մի թիզ հողի համար կռվել մինչև վերջ։ Գորիսի համայնքը պատրաստ է մարտնչել և պաշտպանել իր տարածքը։ Ես մասնակցել եմ հանդիպմանը, քանի որ Սյունիքում ստեղծված իրավիճակը հաճախ մանիպուլացված է, և անհրաժեշտ է հստակ դիրքորոշում արտահայտել և ստանալ պատասխաններ, սակայն վարչապետի հետ հանդիպումից հետո Սյունիքի սահմանների պաշտպանության հետ կապված իմ մտահոգություններն ավելի խորացան, քանի որ որևէ հստակ պատասխան չտրվեց»,- նշեց նա։
Հարցին, թե հանդիպման ընթացքում հնարավոր է, որ կողմ է եղել Սյունիքի միջանցքի տրամադրմանը հակառակորդին, Քոչարյանը պատասխանեց, որ նման բան չի եղել։
«Նման արտահայատություն, նման համաձայնություն չի եղել»,- ասաց նա։
Նշենք, որ մամուլում տեղեկություն էր տարածվել, ըստ որ նախօրեին Նիկոլ Փաշինյանի հետ հանդիպման ընթացքում Սյունիքի համայնքապետները դեմ չեն եղել Սյունիքի միջանցքի տրամադրմանը։