«Արմենիա» միջազգային երաժշտական փառատոնի շրջանակներում, «Երաժշտություն` հանուն ապագայի» մշակութային հիմնադրամի նախաձեռնությամբ, Մշակույթի աջակցության եվրոպական հիմնադրամի (EUFSC) եւ Հայաստանի պետական սիմֆոնիկ նվագախմբի աջակցությամբ, Երեւանում հոկտեմբերի 1-ից 30-ը կայացավ Դասական երաժշտության ակադեմիան։ Ակադեմիայի եւ հետագա համատեղ ծրագրերի մասին NEWS.am-ը զրուցել է «Երաժշտություն` հանուն ապագայի» մշակութային հիմնադրամի տնօրեն Աննա Տեր-Հովակիմյանի հետ։
«Երաժշտություն` հանուն ապագայի» հիմնադրամի նախաձեռնությամբ Երեւանում կայացավ Դասական երաժշտության ակադեմիան։ Ի՞նչ նպատակներ են հետապնդում նման ծրագրերը եւ ինչպե՞ս եք գնահատում արդյունքը։
«Երաժշտություն` հանուն ապագայի» կրթաթոշակի շրջանակներում Երեւանում նման լայնածավալ նախագծի անցկացման գաղափարը ծագեց այն բանից հետո, երբ մեր հիմնադրամը վերջերս մասնակցեց Դուբայի Մերձավոր Արեւելքի Դասական երաժշտության ակադեմիային InClassica միջազգային փառատոնի շրջանակներում, որն ամեն տարի անցկացնում է Մշակույթի աջակցության եվրոպական հիմնադրամը եւ որի նախագահն է Կոնստանտին Իշխանովը: Դուբայում մեր ընկերները մոտ 50 վարպետության դաս ստացան կատարողական արվեստի լավագույն վարպետներից, հանդես եկան համերգներով, եւ դա նրանց համար անմոռանալի ճամփորդություն էր բոլոր առումներով՝ ե՛ւ կրթական, ե՛ւ ճանաչողական։ Այս փորձը մեզ թույլ տվեց ակադեմիան տեղափոխել Հայաստան։ Հայաստանի պետական սիմֆոնիկ նվագախմբի եւ Մշակույթի աջակցության եվրոպական հիմնադրամի շնորհիվ, որոնք մեր գործընկերներն են, հնարավոր դարձավ իրականացնել այս անհավանական նախագիծն «Արմենիա» ամենամյա փառատոնի շրջանակներում։ Համատեղել ենք նաեւ, չեմ վախենա ասել, մեր ժամանակների մեծ երաժիշտների՝ Գիլ Շահամի, Ստեֆեն Իսերլիսի, Պավել Գիլիլովի, Դորա Շվարցբերգի վարպետության դասերը, չվախենամ եւ համերգների հաճախելը փառատոնի շրջանակներում։ Եվ մենք ամեն տարի կրկնելու ենք այս նախագիծը։ Եթե խոսենք կարճաժամկետ արդյունքների մասին, ապա դա մեր կրթաթոշակառուների ելույթներն են որպես ակադեմիայի արդյունք «Տաղանդավոր Հայաստան» համերգաշարի շրջանակներում վարպետության դասեր ստանալուց հետո։ Երկարաժամկետ արդյունքների մասին խոսել դեռ վաղ է, բայց կարծում եմ, եթե կարողանանք շարունակել պարապմունքների այս տեմպը, ապա մոտ ապագայում արդյունքները շոշափելի կլինեն։ Գլխավորը դրանով չբավարարվելն է։
Ինչպիսի՞ն է լինելու Ձեր համագործակցությունն ապագայում Մշակույթի աջակցության եվրոպական հիմնադրամի հետ։
Եվրոպական հիմնադրամի նախագահ Կոնստանտին Իշխանովի հետ մենք արդեն քննարկում ենք հաջորդ տարվա ծրագրերը, իսկ առաջիկայում դուք ամեն ինչի մասին կիմանաք։ Մեր նպատակները համընկնում են եւ, կարելի է ասել, նույն ալիքի վրա ենք։ Դասական երաժշտության ոլորտում տարբեր նախագծեր, որոնք Կոնստանտին Էդուարդովիչը կյանքի է կոչում ամբողջ աշխարհում, եւ նրա վերաբերմունքը հայկական մշակույթի նկատմամբ շատ կարեւոր են մեզ համար: Ինչպես նա ասաց իր վերջին հարցազրույցներից մեկում. «Այսօր չափազանց կարեւոր է աջակցել հենց դասական երաժշտությանը եւ երիտասարդ սերնդի հետաքրքրությանն արվեստի այս յուրահատուկ ձեւի նկատմամբ», եւ ես լիովին կիսում եմ նրա այս տեսակետը:
Ի՞նչ է մեզ սպասվում առաջիկայում, ի՞նչ նախաձեռնություններ է իրականացնելու Հիմնադրամը։
Մենք, ինչպես նախորդ տարի, շարունակում ենք մեր համագործակցությունը Հայաստանի պետական սիմֆոնիկ նվագախմբի հետ։ Մեր կրթաթոշակառուները վարպետության դասեր կունենան բոլոր այն արտիստների հետ, ովքեր այս համերգաշրջանում ելույթ կունենան ՀՊՍՆ-ի հետ, ինչպես նաեւ պրակտիկ պարապմունքներ կունենան նվագախմբի նվագակցողների հետ, եւ դա, կարծում եմ, շատ կարեւոր է։ Կրթաթոշակառուները ներկա կլինեն նվագախմբի փորձերին եւ, իհարկե, համերգներին։ Մաեստրո Սմբատյանի հետ շատ կարեւոր կրթական նախագիծ ենք քննարկում Հայաստանի մարզերի համար։ Այստեղ մենք նույնպես արդեն գործընկերներ ունենք, կարծում եմ մոտ ապագայում կկարողանանք ազդարարել մեկնարկի մասին։ Մարզային երաժշտական դպրոցներն այժմ իսկապես մեր աջակցության կարիքն ունեն, եւ մենք անպայման տեղում կլուծենք կատարողական արվեստի կրթության խնդիրները։
