ՄԱԿ-ի գլխավոր քարտուղար Անտոնիո Գուտերեշը քննադատել է այն, ինչ նա անվանել է «զբոսաշրջային ապարտեիդ», քանի որ ԱՄՆ-ը եւ այլ երկրներ ուղեւորությունների արգելք են սահմանում՝ omicron տարբերակի տարածումը դադարեցնելու համար:
Գուտերեշը Նյու Յորքում լրագրողներին ասել է, որ իրեն անհանգստացնում են մոտ 56 երկրներ, որոնք ճանապարհորդական արգելքներ են սահմանել Հարավային Աֆրիկայում omicron տարբերակի առաջին հայտնաբերումից ընդամենը մի քանի օր անց, հաղորդում է Reuters-ը: Գուտերեշը նշել է, որ սահմանափակումները «ոչ միայն խորապես անհանգստացնում են, այլեւ անարդյունավետ են»: «Մենք ունենք անվտանգ ճանապարհորդելու գործիքներ: Եկեք օգտագործենք այս գործիքները, որպեսզի խուսափենք այս, թույլ տվեք ասել, զբոսաշրջային ապարտեիդից, որը ես անընդունելի եմ համարում»,- ասել է Գուտերեշը։
Նոյեմբերի 24-ին omicron-ի հայտնաբերումից հետո կառավարությունները շտապել են արգելել որոշ երկրներից ճանապարհորդությունները:
Omicron-ն այժմ տարածվել է ԱՄՆ-ում եւ մոտ երկու տասնյակ երկրներում: Առողջապահության համաշխարհային կազմակերպությունը եւ առողջապահական ազգային գործակալությունները դեռ չեն պարզել, թե արդյոք նոր տարբերակն ավելի վարակիչ է կամ ավելի մահացու է, քան մյուս տարբերակները: