ՀՀ Կենտրոնական ընտրական հանձնաժողովի հրապարակած տվյալները հաստատում են Մասիս խոշորացված համայնքի ներկայացուցչական մարմնի ընտրություններում արմատական ընդդիմադիր «Դավիթ Համբարձումյան» դաշինքի հաղթանակի մասին հաղորդումները։ 44 ընտրատեղամասերից 40-ի տվյալների մշակումից հետո ընդդիմադիր ուժի օգտին քվեարկել է ընտրողների 53.56 տոկոսը (13378)։ Դրա միակ մրցակիցը՝ վարչապետ Նիկոլ Փաշինյանի «Քաղաքացիական պայմանագիր» կուսակցությունը, հավաքել է 46.44 տոկոս (11595)։ Մասիսում ընտրողները բավականին ակտիվ են եղել. մասնակցությունը կազմել է 46.88 տոկոս։
Հիշեցնենք, որ Մասիսի քաղաքապետ Դավիթ Համբարձումյանը քրեական հետապնդման էր ենթարկվել եւ կալանավորվել «թավշյա հեղափոխությունից» հետո։ Իր անդամակցությունը նախկինում իշխող Հայաստանի Հանրապետական կուսակցությանը նա չդադարեցրեց: