Ադրբեջանին հայկական տարածքով միջանցք չի տրամադրվելու: Այս մասին այսօր՝ դեկտեմբերի 8-ին, ԱԺ-ում կառավարության հետ հարցուպատասխանի ժամանակ հայտարարեց հանրապետության վարչապետ Նիկոլ Փաշինյանը՝ պատասխանելով ընդդիմադիր «Հայաստան» դաշինքի պատգամավոր Արթուր Ղազինյանի հարցին։

Պատգամավորը, մասնավորապես, միջպետական ​​փոխադրումների կազմակերպման չորս չափորոշիչ է թվարկել, որոնց առկայությունը բացառում է որեւէ «միջանցքային» տրամաբանություն: «Դա հայ սահմանապահների առկայությունն է սահմանին, մաքսային հսկողությունը հայ մաքսավորների կողմից, նշված ճանապարհին ցանկացած միջադեպի հետաքննությունն է հայ իրավապահների կողմից եւ Հայաստանի պետբյուջեի միջոցների հաշվին բոլոր հնարավոր հաղորդակցությունների կառուցումը», - պարզաբանեց պատգամավորը։

Փաշինյանն իր հերթին հայտարարեց, որ այս բոլոր չափանիշները պահպանվելու են, թեեւ առաջինի վերաբերյալ որոշակի վերապահումներ ունի. «Օրինակ, հայ-իրանական սահմանին հայ սահմանապահներ չկան։ Մնացած դեպքերում ամեն բան ձեր թվարկած գործոններին համապատասխան կլինի։ Սյունիքի մարզով ճանապարհը պետք է անցնի Հայաստանի ինքնիշխանության ներքո եւ գործի ՀՀ օրենսդրության շրջանակներում», - ասաց կառավարության ղեկավարը՝ հավելելով, որ այս պայմանը վերաբերում է նաեւ երկաթուղային ճանապարհին։

Վարչապետի խոսքով՝ ներկայումս քննարկվում են ավտոմոբիլային երթուղիների եւ հաղորդակցությունների բացման մի քանի տարբերակներ։ Ինչ վերաբերում է երկաթուղուն, ապա խոսքը Երասխ-Օրդուբադ-Մեղրի-Հորադիզ գծի մասին է։ Փաշինյանը հույս հայտնեց, որ քննարկումների ընթացքում կկարողանան արագ որոշումների եւ որոշակի կոնսենսուսի հասնել։ Նա հավելել է, որ Հայաստանի տարածքով անցնող երթուղիների հատվածները կվերականգնվեն Հայաստանի պետական ​​բյուջեի միջոցների հաշվին։