Դեկտեմբերի 28-ին Սանկտ Պետերբուրգում կայացած Անկախ Պետությունների Համագործակցության (ԱՊՀ) ոչ պաշտոնական գագաթաժողովը շատ արդյունավետ էր։ Այս մասին չորեքշաբթի օրը հայտարարել է ՌԴ նախագահ Վլադիմիր Պուտինը՝ Բելառուսի նախագահ Ալեքսանդր Լուկաշենկոյի հետ հանդիպումից հետո, փոխանցում է «ՌԻԱ Նովոստին»։

«Իմ կարծիքով երեկվա հանդիպումները շատ արդյունավետ էին։ Մենք խոսեցինք ԱՊՀ երկրների հետ հարաբերությունների զարգացման մի ամբողջ շարք ուղղությունների մասին»,- ասել է ՌԴ ղեկավարը։

Նախօրեին նա ԱՊՀ-ի ստեղծումը արդարացված քայլ էր անվանել։ Նրա խոսքով, երկրների միջեւ ինտեգրացիան շատ ոլորտներում խորացել է։ ՌԴ նախագահի կարծիքով, «ԽՍՀՄ ժամանակներից պահպանված կապերը դրական դեր են խաղում», այդ թվում՝ թույլ են տալիս անցնել «համավարակի դժվար ժամանակաշրջանը»։ Պուտինը պարզաբանել է, որ այդ տարիներին ստեղծված կոմունիկացիաներն ու ձեռնարկությունները Ռուսաստանին հնարավորություն են տալիս հաղթահարել համավարակի դժվարությունները։