Հայաստանում դատարանը կկարողանա սահմանափակել խոսքի իրավունքը, ինչպես նաեւ կողմերից որեւէ մեկի այլ իրավունքները, եթե այդ պատրվակով գործընթացն արհեստականորեն ձգձգվի։ Այս մասին հունվարի 18-ին Ազգային ժողովի նիստին Դատական օրենսգրքում եւ հարակից օրենքներում փոփոխություններ եւ լրացումներ կատարելու մասին օրինագծերի փաթեթի քննարկման ժամանակ ասաց արդարադատության փոխնախարար Երանուհի Թումանյանցը՝ պատասխանելով «Հայաստան» ընդդիմադիր խմբակցության պատգամավոր Արամ Վարդեւանյանի հարցին, ով դեմ է արտահայտվել օրենսդրական նախաձեռնությանը:
Պատգամավորի խոսքով՝ դատավորները կկարողանան կամայականորեն սահմանափակել մեղադրյալների պաշտպանության իրավունքը։
Ի պատասխան՝ փոխնախարարը նշեց, որ դատարանը կարող է նման սանկցիա կիրառել ոչ միայն մեղադրյալի, այլեւ դատավարության ցանկացած այլ կողմի նկատմամբ։
Նա, մասնավորապես, հիշեցրեց, որ նման օրենսդրական փոփոխությունների հիմքը 2021 թվականի հոկտեմբերի 12-ի որոշմամբ տվել է Սահմանադրական դատարանը։ Սահմանադրական դատարանն արձանագրել է, որ սահմանափակումը համապատասխանում է համաչափության սահմանադրական պահանջին, քանի որ եթե կողմերից մեկը չարաշահում է իր իրավունքները, ապա տուժում են մյուս կողմի նույնքան օրինական իրավունքները։
«ՍԴ-ն եւս այստեղ հակասություններ չի տեսել Մարդու իրավունքների եվրոպական կոնվենցիայի 6-րդ հոդվածի հետ։ Իհարկե, ձեր նշած ռիսկերը կարող են լինել, բայց շատ բան, ինչպես մյուս դեպքերում, կորոշի իրավակիրառական պրակտիկան»,- ասաց Թումանյանցը։