Ուրբաթ Լեհաստանի վարչապետ Մատեուշ Մորավեցկին կոչ է արել եվրոպական առաջնորդներին ձեւավորել կոշտ, միասնական դիրքորոշում Ռուսաստանի նկատմամբ «մտավախությունների ֆոնին, որ Մոսկվան կարող է ներխուժել Ուկրաինա», հաղորդում է Reuters-ը:

Ուրբաթ Ուկրաինայի նախագահ Վլադիմիր Զելենսկին ավարտել է երկօրյա բանակցություններն իր լեհ պաշտոնակից Անջեյ Դուդի հետ, եւ Լեհաստանը հայտարարել է, որ Կիեւը կարող է ստանալ Լեհաստանի աջակցությունը Ռուսաստանի հարձակման դեպքում:

Սակայն Վարշավան չի հայտնել հստակ տվյալներ, թե ինչ ձեւաչափով այդ աջակցությունը կարող է ցուցաբերվել:

«Լեհաստանն ամբողջովին սատարում է Ուկրաինային վերջինիս արեւմտամետ ձգտումներում»,-հայտարարել է վարչապետ Մատեուշ Մորավեցկին:

«Ռուսական սպառնալիքի առջեւ եվրոպական միասնականությունն ու սոլիդարությունն առանցքային են Ուկրաինայի համար: Ռուսաստանը պետք է իմանա, որ գործ ունի միասնական ճակատի հետ»,-հավելել է նա:

Արեւմտյան երկրները մտահոգվում են, որ Մոսկվան հարձակում է նախապատրաստում Ուկրաինայի վրա: Ռուսաստանը հերքում է, որ պատրաստվում է հարձակվել: