Մեքսիկացի լրագրող Լուրդես Մալդոնադոն, ով հայտարարել էր, որ շահել է Ստորին Կալիֆորնիա նահանգի նախկին նահանգապետի դեմ դատը, գնդակահարվել է Տիխուանա քաղաքում գտնվող իր տան մոտ, հայտնում է «ՌԻԱ Նովոստի»-ն՝ վկայակոչելով Sol de Tijuana-ի տեղական պարբերականը՞
Կիրակի օրը լրագրող Լուրդես Մալդոնադոյին մահացած են գտել Տիխուանա քաղաքում գտնվող իր տան մոտ:
Նախնական տվյալներով՝ երբ լրագրողն ավտոմեքենայով հասել էր իր տուն, նրա վրա զինված հարձակում էր իրականացվել: Լրատվամիջոցները հայտնում են, որ կրակել են կնոջ գլխին:
Անցյալ շաբաթ Մալդոնադոն հայտնել էր, որ 9 տարվա դատավարությունից հետո շահել է աշխատանքային դատը Բաջա Կալիֆորնիայի նախկին նահանգապետ Խայմե Բոնիլլա Վալդեզի դեմ, ում ընկերությունում՝ Primer Sistema de Noticias-ում (PSN), նա աշխատում էր: Բացի այդ, նա դատական հայց էր ներկայացրել Վալդեսի փաստաբանի՝ նախկին գլխավոր դատախազ Գիլերմո Ռուիս Էրնանդեսի դեմ՝ ենթադրյալ իշխանության չարաշահման եւ այլ հանցագործությունների համար:
Հաղորդվում է, որ 2019 թվականին երկրի նախագահ Անդրես Մանուել Լոպես Օբրադորի մամուլի ասուլիսի ժամանակ լրագրողը հայտնել է Վալդեսի դեմ իր գործի մասին եւ հայտարարել, որ վախենում է իր կյանքի համար։ 2021 թվականից նա գտնվում է դաշնային կառավարության պաշտպանության ներքո։
Մալդոնադոն դարձել է երկրորդ լրագրողը, ով սպանվել է Ստորին Կալիֆորնիայում վերջին շաբաթվա ընթացքում։ Ավելի վաղ հաղորդվել էր, որ լրագրող Մարգարիտո Մարտինեսը սպանվել է Տիխուանա քաղաքի իր տան շեմին։ Մարտինեսը, որպես հեղինակ եւ լուսանկարիչ, համագործակցել է տեղական եւ միջազգային պարբերականների հետ՝ կենտրոնանալով տարածաշրջանային հանցագործության թեմայի վրա։
2021 թվականին Մեքսիկայում յոթ լրագրող է սպանվել, ինչը ամենաբարձր ցուցանիշն է աշխարհի երկրների թվում: