ՀՀ վարչապետ Նիկոլ Փաշինյանի օրոք Եվրոպան Հայաստանին զրկեց երրորդ նախագահ Սերժ Սարգսյանի օրոք սկսված արտոնյալ ռեժիմից, որն ազատում էր մեզ ուղեկցվող ապրանքների 2/3-ի մաքսատուրքից։ Այս մասին հունվարի 25-ին լրագրողների հետ հանդիպմանն ասաց Հայաստանի Հանրապետական կուսակցության փոխնախագահ Արմեն Աշոտյանը։
Նա համոզմունք հայտնեց, որ Նիկոլ Փաշինյանը կեղծել է մեկ շնչինբաժին ընկնող ՀՆԱ-ի տվյալները եւ արհեստականորեն բարձրացրել է դրանք։ «Դա բերեց նրան, որ Հայաստանը դուրս բերվեց արտոնյալ ռեժիմից։ Այս որոշումից վնասը տարեկան 150 միլիոն եվրո է կազմում»,- հավելեց քաղաքական գործիչը։
Նա սուտ անվանեց Փաշինյանի այն խոսքերը, թե Ադրբեջանից Նախիջեւան երկաթգծի կառուցումը տասնյակ անգամ ավելի էժան է, քան Հյուսիս-Հարավը՝ հաշվի առնելով, որ Եվրամիությունը Հայաստանին 600 մլն եվրո է հատկացրել։ «Այս ֆոնին նա ասում է, որ Թուրքիայի տարածքով հայկական արտադրանքի արտահանումը Եվրոպա էժանանալու է։ Ո՞ր են հաշվարկները: Փաշինյանն ասում է, որ հաղորդակցությունների ապաշրջափակումը կապահովի Ղարաբաղի անվտանգությունն ու բարեկեցությունը, սակայն Ղարաբաղին նաեւ Ադրբեջանի կազմից դուրս կարգավիճակ է անհրաժեշտ։ Առանց դրա այնտեղ հայեր չեն մնա»,- արձանագրեց Աշոտյանը։