Առնվազն երեք հրթիռ ընկել Բաղդադի միջազգային օդանավակայանի տարածքում եւ հարակից ռազմաբազայում, որտեղ տեղակայվում են ամերիկացի խորհրդականները՝ վնասելով լքված կոմերցիոն ինքնաթիռը: Տուժածներ չկան: Այս մասին հայտնում է AP-ն՝ վկայակոչելով իրաքյան պաշտոնյաներին:
Իրաքյան ավիաուղիները՝ երկրի գլխավոր փոխադրողը, հայտնել է, որ հարձակման հետեւանքով վնասվել է շահագործումից հանված մի ինքնաթիռ, որը կայանված էր օդանավակայանի մոտ, սակայն օպերացիաներն ընթանում են բնականոն հունով եւ հետաձգումներ չեն սպասվում:
ԱՄՆ-ի գլխավորած կոալիցիան անցյալ ամիս պաշտոնապես ավարտեց իր մարտական առաքելությունը՝ աջակցելով իրաքյան ուժերին «Իսլամական պետություն» խմբավորման դեմ շարունակվող պայքարում: Մոտ 2500 զինծառայող կմնա երկրում, քանի որ կոալիցիան կանցնի խորհրդատվական առաքելությանը՝ իրաքյան ուժերին աջակցությունը շարունակելու համար: