Ղազախստանում իրավապահները խոշտանգելով սպանել են անկարգությունների 6 մասնակիցների, հաղորդում է «КазТАГ» գործակալությունը։
«Բառացիորեն օրերս մենք վարույթ ենք ընդունել քրեական գործերը հարցաքննության անթույլատրելի մեթոդների կիրառման փաստով։ Մեզ փոխանցվել են ոչ բոլոր նման դեպքերը, այլ միայն ծանր հետեւանքներով դեպքերը։ Մեր տեղեկություններով՝ նման հանգամանքներում Ալմաթիի ժամանակավոր կալանավայրում մահացել է երկու մարդ, երեքը՝ Արեւելյան Ղազախստանի շրջանում, մեկ մարդ՝ Թալդըկորգանում»,- ասել է գլխավոր դատախազության հատուկ դատախազների ծառայության պետ Ռիզաբեկ Օժարովը։
Նա մանրամասնել է, որ դատախազությունը հետաքննում է Թալդըկորգանի բնակիչների նկատմամբ խոշտանգումների եւ բռնությունների գործը։
«Այդ փաստերով նախաքննությունը շարունակվում է, արդյունքների մասին անպայման կտեղեկացնենք։ Բայց կարող եմ ասել, որ նման հանցագործությունները զանգվածային բնույթ չեն կրում»,- պարզաբանել է Օժարովը: