Հայաստանում գործող ընտրողների նույնականացման համակարգը չի բացառում կրկնակի քվեարկության հնարավորությունը։ Այս մասին ԱԺ պետաիրավական հարցերի մշտական հանձնաժողովի նիստում ԿԸՀ-ի՝ 2020-2021թթ․գործունեության վերաբերյալ հաշվետվության քննարկման ժամանակ հայտարարեց «Հայաստան» խմբակցության պատգամավոր Արթուր Ղազինյանը։
Նրա խոսքով՝ ընտրողների նույնականացման համակարգն ի սկզբանե ներդրվել է կրկնակի քվեարկությունն ու այսպես կոչված «կարուսելի» կիրառումը բացառելու նպատակով։
«Փաստացի տեղում ընտրական հանձնաժողովները հասանելիություն չունեն տվյալների ընդհանուր բազայի նկատմամբ։ Տրված տեղեկության համաձայն՝ օգտագործվող համակարգը փաստացի չի հայտնաբերի կրկնակի քվեարկության դեպքեր»,- պարզաբանեց պատգամավորը։
ԿԸՀ նախագահ Տիգրան Մուկուչյանը հաստատեց պատգամավորի մտավախությունները։ Նա, մասնավորապես, նշեց, որ այս կամ այն ընտրատեղամասում գործող սարքերը սինքրոնացված են տարածքային կենտրոնի հետ։ Այսինքն՝ նույն տարածքային ընտրատարածքում ընտրողը երկրորդ կամ երրորդ անգամ չի կարողանա քվեարկել։
«Եթե անձը գրանցված չէ կոնկրետ տեղամասում, նա պարզապես չի կարողանա քվեարկել։ Նման մեխանիզմ է ընտրվել՝ հաշվի առնելով ընտրությունների օրը ցանցային տեխնոլոգիաների կիրառման հետ կապված հնարավոր խնդիրները։ Տեխնիկական խնդիրների առաջացման դեպքում ամբողջական համակարգի աշխատանքի ժամանակ կարող է ձախողվել ամբողջ գործընթացը»,- պարզաբանեց Մուկուչյանը։