Երևանում Նիկոլ Փաշինյանի հրաժարականի պահանջով ու Հայաստանի և Արցախի անվտանգությամբ անհանգստացած քաղաքացիները շարունակում են բողոքի ակցիաներն ու անհնազանդության գործողությունները։

«ՀՀ Ոստիկանությունը մայթեզրից առևանգեց մի խումբ քաղաքացիների՝ առանց օրինական պահանջի ներկայացման և անհամաչափ բռնի ուժի կիրառմամբ։

նիկոլի ժողովրդավարության բաստիոն Հայաստանում ապօրինությունները շարունակվում են»,- հայտնում են  ՀՅԴ «Նիկոլ Աղբալյան» ուսանողական միությունից։

Միությունից տեղեկացնում են, որ այսօր ոստիկանության կողմից առևանգվել են ՀՅԴ ՆԱՈՒՄ ընկերներ Տարոն Ղազարյանը, Սարգիս Բաղդասարյանը, Գառնիկ Մելքումյանը, Ամիրան Գալավորյանը, Թադևոս Սարգսյանը, Գևորգ Գյուլոմյանը՝ առանց օրինական պահանջի ներկայացման և անհամաչափ բռնի ուժի կիրառմամբ։

Նշենք, որ այսօր վաղ առավոտից  քաղաքացիները կրկին կաթվածահար են արել մայրաքաղաքի մի շարք փողոցներ:

Նախօրեին ՀՅԴ ԳՄ անդամ, ԱԺ փոխնախագահ Իշխան Սաղաթելյանը հայտարարեց, որ պայքարը պետք է մեծացնեն եւ ընդգրկեն ամբողջ Հայաստանը։ Նա կոչ արեց մարզերի բնակչությանը մարզերում վերսկսել բողոքի ակցիաներ եւ ցույցեր:

Ավելի վաղ NEWS.am-ը հայտնել էր, որ մայիսի 2-ից խաղաղ անհնազանդության ակցիաներ են սկսվել Երեւանում, փակվել են մի շարք փողոցներ: Մայիսի 2-ից Երևանի Ֆրանսիայի հրապարակում հանրահավաքներ են իրականացվում։