Ռուսաստանի Դաշնության փոխվարչապետ Ալեքսանդր Նովակը Թուրքիայի առեւտրի նախարար, միջկառավարական հանձնաժողովի թուրքական մասի նախագահ Մեհմեդ Մուշի հետ քննարկել է Ռուսաստանի եւ Թուրքիայի միջեւ Բարձր մակարդակի համագործակցության խորհրդի իններորդ նիստի նախապատրաստական աշխատանքները։
ՌԴ կառավարության մամուլի ծառայությունից հայտնում են, որ հանդիպման ընթացքում հատուկ ուշադրություն է դարձվել Ռուսաստանի եւ Թուրքիայի միջեւ Բարձր մակարդակի համագործակցության խորհրդի իններորդ նիստի նախապատրաստմանը, ինչպես նաեւ երկրների միջկառավարական հանձնաժողովի հաջորդ՝ 18-րդ նիստի անցկացմանը։
Նովակի խոսքով՝ Ռուսաստանի եւ Թուրքիայի միջեւ գործարար համագործակցությունն աննախադեպ բարձր մակարդակի է հասել, դա ամենաբարձր մակարդակով ինտենսիվ քաղաքական երկխոսության արդյունք է։ «Ես եւ իմ թուրք ընկերները միշտ ընդհանուր լեզու ենք գտել ամենատարբեր հարցերի շուրջ: Հանձնաժողովը շարունակական աշխատանք է տանում ռուս-թուրքական տնտեսական համագործակցության բոլոր ոլորտներում։ Չնայած ներկա տնտեսական իրավիճակին՝ մեր երկրների միեւ ապրանքաշրջանառությունն աճ է գրանցում. 2021 թվականին այն աճել է 57.0 տոկոսով՝ մինչեւ 33.0 մլրդ ԱՄՆ դոլար՝ այս տարի միայն առաջին եռամսյակում աճելով 2.1 անգամ՝ մինչեւ 13.7 մլրդ դոլար: Ստեղծված հանգամանքները նոր հնարավորություններ են բացում մեր պետությունների առջեւ՝ փոխշահավետ կապերի ամրապնդման եւ զարգացման համար»,- նշել է փոխվարչապետը։
Երկրների կառավարությունները լիովին գոհ են համատեղ խոշոր նախագծերի զարգացման տեմպերից՝ ինչպես արդեն իրականացված «Կապույտ հոսք» եւ «Թուրքական հոսք» գազատարների, այնպես էլ կառուցման փուլում գտնվող «Ակկույու» առաջին թուրքական ատոմակայանի։
Ընդ որում, փոխվարչապետի խոսքով, ապրանքաշրջանառության դրական միտումը պահպանելու համար կարեւոր է շարունակել աշխատանքը երկկողմ առեւտրում խոչընդոտների նվազեցման ուղղությամբ։ Այս կապակցությամբ ակտիվորեն զարգանում է համագործակցությունը երկու երկրների մաքսային ծառայությունների միջեւ, նշել է Ալեքսանդր Նովակը։ Օրակարգում են եղել նաեւ երկրների համագործակցությունը ֆինանսաբանկային, տրանսպորտի եւ լոգիստիկայի, արդյունաբերության եւ էներգետիկայի, գյուղատնտեսության եւ տուրիզմի ոլորտներում:
Տրանսպորտի մասով երկրներն աշխատում են արտահանման ենթակառուցվածքում խոչընդոտների ընդլայնման ուղղությամբ, որոնք թույլ չեն տալիս զգալիորեն ավելացնել փոխադարձ առեւտրի թողունակությունը: Ապագայում Ռուսաստանն ու Թուրքիան կարող են համատեղ նոր, տեխնոլոգիապես ավելի բարդ արդյունաբերություններ զարգացնել, ինչպիսիք են նավաշինությունը, ավիացիոն արդյունաբերությունը եւ տիեզերագնացությունը, դեղագործությունը, ինչպես նաեւ աշխատել թվային եւ էներգաարդյունավետ տեխնոլոգիաների ուղղությամբ, ասել է Ալեքսանդր Նովակը Թուրքիայի եւ ՌԴ-ի գործարար շրջանակների ներկայացուցիչների հետ հանդիպման ժամանակ։
«Ռուսաստանում թուրքական ընկերությունների նկատմամբ մեծ հետաքրքրություն կա, աճում է Թուրքիայի հետ աշխատել ցանկացող ձեռնարկությունների թիվը»,- նշել է Նովակը: