Այս օրերին ամենակարևոր հարցերից մեկը հետևյալն է՝ եթե այս իշխանությունները հեռանան, ի՞նչ պետք է անել, ի՞նչ քայլեր և գործողություններ պետք է ձեռնարկեն հաջորդիվ՝ իրական, արժանապատիվ խաղաղության հասնելու համար։ Այս մասին այսօր՝ մայիսի 21-ին, Ֆրանսիայի հրապարակում հայտարարեց Դիմադրության շարժման համակարգող, ԱԺ փոխնախագահ Իշխան Սաղաթելյանը։
Նա կտրուկ քննադատեց Հայաստանի իշխանությունների կողմից Ադրբեջանին ներկայացված առաջարկները՝ նշելով, որ դրանք ոչինչ չեն ասում, դիվանագիտորեն սխալ են ձևակերպված և չեն արտահայտում հայ ժողովրդի շահերը
«Հայկական կողմը կարող է բանակցային գործընթացին մոտենալ ավելի ամուր, միջազգային հանրության համար հասկանալի դիրքերից»,-շեշտեց նա։
Այս առումով նա ներկայացրեց արժանապատիվ խաղաղության հասնելուն ուղղված չորս հիմնական կետեր
Իշխան Սաղաթելյանը նախ նշեց հապճեպ, վտանգավոր և ճակատագրական կտրուկ քայլերից զերծ մնալու անհրաժեշտությունը։
Երկրորդ․ նա նշեց անվտանգ միջավայրի ստեղծման անհրաժեշտությունը, որը կանխատեսելի և հասկանալի կլինի ռազմավարական դաշնակցի և այլ կարևոր տարածաշրջանային և միջազգային գործընկերների համար։
Երրորդը, ըստ քաղաքական գործչի, անհրաժեշտ է անհապաղ մշակել և իրականացնել հեռանկարային և ռազմավարական հայեցակարգ ռազմական, ռազմարդյունաբերական, տեխնոլոգիական, տնտեսական և ենթակառուցվածքային ոլորտներում։
Իսկ չորրորդ կետը նա անվանեց հայության ողջ ներուժի համախմբումը։