Թուրքիայում ապրիլի 24-ին զորամասում զինակցի կողմից սպանված հայազգի Սեւակ Շահինի գործով առաջին դատական լսման ժամանակ հետաքրքիր իրադարձություն է տեղի ունեցել, որը դուրս էր մնացել լրատվամիջոցների աչքից:
Ինչպես տեղեկացնում է թուրքական Sabah-ը` վկայակոչելով «Ակոս»-ին, Դիարբեքիրի զինվորական դատարանում բարձրաստիճան մի զինվորական, ում անունը չի հայտնվում, հայտարարել է, թե Սեւակի սպանությունից հետո ականատես մի զինվոր մոտեցել է իրեն` ասելով, թե Քվանչ Աղաօղլուն Սեւակին ասել էր. «Թմբլիկ, քեզ սպանելու եմ»: Սակայն դատին ներկա մյուս զինվորականները հերքել են այս խոսքերը:
Այս կապակցությամբ, Սեւակի փաստաբան Ջեմ Հալավուրթը շեշտել է, թե այդ խոսքում ճշմարտություն կա, քանի որ դեպքից հետո ականատես զինվորները նույն բանն էին ասում, սակայն դատարանում լրիվ ուրիշ վկայություն են տալիս:
Նշենք, որ թուրքական դատարանը հենց առաջին դատական նիստի վերջում որոշել է, որ Քվանչ Աղաօղլուն փախչելու առիթ չունի եւ ազատ արձակել նրան՝ փոխելով խափանման միջոցը:
Ռազմական դատախազության կողմից պատրաստված մեղադրականում Քվանչ Աղաօղլուի համար պահանջվում է ընդամենը 9 տարվա ազատազրկում՝ «անփոթության հետեւանքով մարդ սպանելու համար»:
Հիշեցնենք որ 25-ամյա Սեւակն ավարտել էր Ստամբուլի տեխնիկական համալսարանի գեղեցիկ արվեստների ֆակուլտետը եւ ծառայության էր անցել Բաթման նահանգի Քոզլուքի շրջանում տեղակայված ժանդարմերիայի զորամասում: Սեւակի զորացմանը մնացել էր 23 օր, երբ նա սպանվեց զինակցի կողմից հենց ապրիլի 24-ին:
Սպանության ականատես զինվորները նշել էին, որ սպանության պահին Քվանչի հրազենի փողը ուղղված է եղել Սեւակի կողմ: Դեպքին ականատես զինվորներից Ֆազլա Քեսքինը պատմել, որ կրակոցի ձայնը լսելուց հետո Սեւակն ասել է. «Քվանչ եղբայր, այս ի՞նչ արեցիր, հասիր»: