Մեծ Բրիտանիան տուգանել է դեմքի նույնականացման ամերիկյան Clearview AI Inc ընկերությանը ավելի քան 7.5 միլիոն ֆունտ ստեռլինգով (9.4 միլիոն դոլար)՝ առանց նրանց իմացության մարդկանց առցանց պատկերները կուտակելու համար, հայտնում է AFP-ն:

Միացյալ Թագավորության տվյալների վերահսկման մարմինը նաեւ կարգադրել է ընկերությանը դադարեցնել ՄԹ բնակիչների առցանց հասանելի անձնական տվյալների հավաքումը եւ հեռացնել Միացյալ Թագավորության բնակիչների տվյալներն իր համակարգերից:

Clearview AI Inc-ն տվյալների բազա ունի՝ մարդկանց ավելի քան 20 միլիարդ դեմքերի պատկերներով, որոնք վերցվել են համացանցից եւ սոցցանցերից՝ առանց մարդկանց հայտնելու, թե ինչպես է հավաքվել այդ տեղեկատվությունը:

Ընկերության հաճախորդները, այդ թվում՝ ոստիկանությունը, կարող են անձի պատկերը վերբեռնել հավելվածում, որը ստուգում է տվյալների բազան համապատասխանության համար:

Clearview AI Inc.-ը մարդկանց մի քանի պատկեր է հավաքել ամբողջ աշխարհից, այդ թվում՝ Մեծ Բրիտանիայում, տարբեր կայքերից եւ սոցցանցերից եւ ավելի քան 20 միլիարդ պատկերներից տվյալների բազա է ստեղծել,- ասել է Մեծ Բրիտանիայի տեղեկատվության հանձնակատար Ջոն Էդվարդսը:- Ընկերությունը ոչ միայն հնարավորություն է տալիս նույնականացնել այդ մարդկանց, այլեւ արդյունավետորեն հետեւում է նրանց վարքագծին եւ ​​որպես կոմերցիոն ծառայություն առաջարկում դա: Դա անընդունելի է»։

ICO-ն պարզել է, որ Clearview AI Inc-ը խախտել է Միացյալ Թագավորության տվյալների պաշտպանության օրենքները՝ չկարողանալով Մեծ Բրիտանիայում մարդկանց տեղեկատվությունն օգտագործել «արդար եւ թափանցիկ» եղանակով եւ չկարողանալով կանխել տվյալների անժամկետ պահպանումը:
Այս ամսվա սկզբին Clearview AI-ն համաձայնել էր սահմանափակել մուտքը դեմքի նույնականացման իր հակասական տվյալների բազա Միացյալ Նահանգներում՝ լուծելով գաղտնիության պաշտպանների կողմից ներկայացված հայցը: