Թուրքիայի նախագահի աշխատակազմի կապերի բաժնի ղեկավար Ֆահրեթթին Ալթունը հայտարարել է հացահատիկի հարցով Ստամբուլում օպերատիվ կենտրոնի ստեղծման շուրջ կոնսենսուսի ձեռք բերման մասին:
«Մենք ստանձնեցինք միջնորդի դերը, եւ շփումների արդյունքում կոնսենսուս ձեռք բերվեց Ստամբուլում օպերատիվ կենտրոնի ստեղծման շուրջ։ Հույս ունենք, որ հացահատիկով բեռնված նավերը հնարավորինս շուտ դուրս կբերվեն։ Մենք մեծ նշանակություն ենք տալիս այս գործընթացի անվտանգ իրականացմանը եւ ցանկացած դժբախտ պատահարների կանխմանը»,- ասել է Ալթունը իտալական Il Messaggero թերթին տված հարցազրույցում։
Ավելի վաղ Թուրքիայի ազգային պաշտպանության նախարար Հուլուսի Աքարը հայտարարել էր, որ որոշակի առաջընթաց կա Սեւ ծովի նավահանգիստներից հացահատիկի արտահանման հարցում, սակայն կան տեխնիկական հարցեր, որոնք քննարկումներ են պահանջում Ռուսաստանի, Ուկրաինայի եւ ՄԱԿ-ի հետ։ Թուրքիայի արտաքին գործերի նախարար Մեւլութ Չավուշօղլուն հինգշաբթի հայտարարել էր, որ եթե Մոսկվան եւ Կիևը պայմանավորվեն «հացահատիկի խնդրի շուրջ», ապա Ուկրաինայի ջրերից դուրս «անվտանգության գոտի» կստեղծվի։