Լիտվայի խորհրդարանում կքննարկվի Բելառուսի հետ սահմանին ռազմական ամրություններ կառուցելու հարցը, հայտնել է երկրի Սեյմի ազգային անվտանգության եւ պաշտպանության կոմիտեի նախագահ Լաուրինաս Կասչյունասը, փոխանցում է ՏԱՍՍ լրատվական գործակալությունը:
Կոմիտեի նախագահի խոսքով, հանրապետության սահմանապահներն արդեն պատրաստել են երկու պետությունների սահմանի ամենախնդրահարույց վայրերի վերլուծությունը։
«Չորեքշաբթի օրը`օգոստոսի 10-ին կայանալիք հանդիպման ժամանակ, նախատեսվում է քննարկել Բելառուսի հետ սահմանին ինժեներական գծի եւ ամրությունների կառուցման հարցը զարգացնելու ուղղությունները։ Մեր խնդրանքով սահմանային գործակալությունը պատրաստել է սահմանի ամենախնդրահարույց վայրերի վերլուծություն»,- նշել է Կասչյունասը։
Ինչպես նշել է լիտվացի պատգամավորը, Սեյմի ազգային անվտանգության կոմիտեում կայանալիք լսումների շրջանակում միջոցներ կփնտրեն, որոնք կօգնեն Լիտվային դանդաղեցնել հակառակորդի առաջխաղացումը ցամաքում`Բելառուսի կողմից հնարավոր հարձակման դեպքում։
Լիտվայի եւ Բելառուսի սահմանը մոտ 680 կիլոմետր է։ Անցյալ տարվանից Վիլնյուսը խոսում է այն ամրացնելու անհրաժեշտության մասին, որն ի սկզբանե կապված էր Մերձավոր Արևելքից եւ Աֆրիկայից բալթյան երկրներ ու Լեհաստան բելառուսական տարածքից փախստականների կտրուկ հոսքի պատճառով առաջացած միգրացիոն ճգնաժամի հետ: