Կրակոցներ՝ Աշտարակ քաղաքում. հայր ու որդի կասկածվում են նախկին ոստիկանին ծեծի ենթարկելու մեջ. վերջինս էլ իր մոտ եղած ատրճանակից կրակոցներ է արձակել.

Արագածոտնի մարզում երեկ՝ օգոստոսի 16-ին, վիճաբանություն-ծեծկռտուք է տեղի ունեցել, կրակոցներ են հնչել: Ժամը 22:00–ի սահմաններում ոստիկանության Աշտարակի բաժին ՀՀ ոստիկանության օպերատիվ կառավարման կենտրոնից տեղեկություն է փոխանցվել, որ Աշտարակ քաղաքում կրակոցներ են հնչել:

Shamshyan.com-ի փոխանցմամբ՝ ահազանգով մեկնել է ոստիկանության Աշտարակի բաժնի օպերատիվ խումբը՝ բաժնի պետի տեղակալի գլխավորությամբ: Ոստիկանները պարզել են, որ Ալեք Մանուկյան փողոցի  23 շենքի բակում դեռևս ստացված օպերատիվ տվյալներով տեղի է ունեցել կենցաղային հարցերի շուրջ վիճաբանություն Աշատարակ քաղաքի բնակիչներ, 45-ամյա Արայիկ Գ.-ի, մյուս կողմում՝ 59-ամյա Գագիկ Վ.-ի, 32-ամյա Նարեկ Վ.-ի և 36-ամյա Ռոբերտ Վ.-ի միջև, որի  ժամանակ վեջիններս ձեռքերով ու ոտքերով հարվածներ են արձակել Արայիկ Գ.-ի մարմնի տարբեր մասերին, պատճառելով մարմնական վնասվածքներ:

Պարզվել է նաև, որ  այդ  ժամանակ Արայիկ Գ.-ն իր անվամբ հաշվառված  ատրճանակից  կրակոցներ է արձակել օդ: Ոստիկաններին հաջողվել է Նարեկ Վ.-ին, Ռոբերտ Վ.-ին և Արայիկ Գ.-ին հայտնաբերել և նրանց տեղափոխել ոստիկանության Աշտարակի բաժին, որտեղից էլ՝ ներկայացվել են Հայաստանի քննչական կոմիտեի Արագածոտնի մարզային քննչական վարչություն:

Ոստիկանությունը ձեռնարկում է անհրաժեշտ օպերատիվ-հետախուզական միջոցառումներ՝ Գագիկ Վ.-ին հայտնաբերելու ուղղությամբ:

Կայքի տեղեկություններով՝ Գագիկ Վ.-ն, Նարեկի և Ռոբերտի հայրն է, իսկ Արայիկ Գ.-ն ոստիկանության նախկին աշխատակից է: