Անկարան իր առջեւ նպատակ Սիրիայի նախագահ Բաշար ալ Ասադին պետության ղեկավարի պաշտոնից տապալելու չի դնում, վստահեցրել է Թուրքիայի առաջնորդ Ռեջեփ Թայիփ Էրդողանը։
«Մենք մեր առջեւ Ասադի տապալման կամ չտապալման խնդիր չունենք դրցած։ Բոլոր այն քայլերը, որոնք մենք այժմ ձեռնարկում ենք Սիրիայում, այդ թվում՝ Ռուսաստանի հետ համակարգմամբ, ուղղված են ահաբեկչության դեմ պայքարին Եփրատի արեւելյան եւ արեւմտյան հատվածներից մինչեւ Միջերկրական ծով»,- ընդգծել է Էրդողանը, փոխանցում է «Լենտա»-ն՝ վկայակոչելով CNN Turk-ը։
Թուրքիայի ղեկավարը կտրականապես հերքել է Դամասկոսի տարածքի նկատմամբ Անկարայի հավակնության մասին լուրերը՝ ընդգծելով, որ Թուրքիան կողմ է Սիրիայի տարածքային ամբողջականությանը։ Էրդողանի խոսքով՝ ինքը Սիրիայի հարցով կապեր է պահպանում ՌԴ նախագահ Վլադիմիր Պուտինի հետ։
«Մենք հուսով ենք, որ մոտ ապագայում Սիրիայում նոր սահմանադրություն կընդունվի, որը թույլ կտա կայունացնել իրավիճակը եւ անհրաժեշտ քայլեր ձեռնարկել առկա խնդիրները լուծելու համար»,- եզրափակել է նա։