Բելառուսի նախագահ Ալեքսանդր Լուկաշենկոն Բելառուսի նախագահի պաշտոնում առաջին անգամ այցելել է Աբխազիա, հաղորդում է «Коммерсантъ»-ը։
Պարբերականը նշում է, որ Աբխազիայի անկախությունը Բելառուսը չի ճանաչել։
Աբխազիայի նախագահի մամուլի ծառայության հաղորդմամբ՝ Լուկաշենկոյի եւ Աբխազիայի նախագահ Ասլան Բժանիայի հանդիպումը կայացել է Պիցունդայում։
Լուկաշենկոն նշել է, որ իր այցը կապված չէ ինչ-որ հատուկ իրադարձության հետ։
«Մեզ մոտ նորմալ իրավիճակ է։ Մենք չենք տառապում որեւէ աշխարհաքաղաքականությամբ։ Մենք պարզապես խաղաղ, բարի, աշխատասեր ժողովուրդ ենք եւ ցանկանում ենք համերաշխ ապրել»,-նշել է Լուկաշենկոն։
Նրա խոսքով՝ Բելառուսը եւ Ռուսաստանը համաձայնեցնում են իրենց գործողությունները։
«Այսօր մենք տեսնում ենք՝ ինչպիսին է դարձել աշխարհը։ Մեզ հանգիստ չենք թողնում։ Դա է պատճառը, որ մենք պետք է ամրապնդենք մեր բարեկամների հետ կապերը»,-հավելել է նա։