Լեհ հնագետները Նովի հռոմեական լեգեոներների ճամբարում պեղումների ժամանակ հայտնաբերել են տարա, որը կարելի է բնութագրել որպես հնագույն «սառնարան»՝ պատրաստված կերամիկական ափսեներից՝ սնունդ պահելու համար, գրում է Planet Today-ը։

Նովի լեգեոնական ամրոցը հնագիտական վայր է Դանուբի վրա՝ հյուսիսային Բուլղարիայում, Սվիշտով քաղաքի մոտ, որը հիմնադրվել է մ.թ. 1-ին դարի կեսերին։

Ճամբարում, որը զբաղեցնում է 17,99 հեկտար տարածք, հայտնաբերվել են մեծ շինություններ, որոնցից գլխավորը շտաբի շենքն է (principia), թեեւ ոչ պակաս տպավորիչ են լեգեոներական հիվանդանոցը (valetudinarium) եւ բաղնիքները (thermae legionis)։

Այս սեզոնին պեղումների ժամանակ թիմը հայտնաբերել է հատակի տակ թաղված, կերամիկական թիթեղներից պատրաստված կոնտեյներ, որը բերդի բնակիչները օգտագործել են որպես «սառնարան»՝ մթերք պահելու համար։ Կոնտեյները հայտնաբերվել է զորանոցում։

Կոնտեյների ներսում թիմը հայտնաբերել է խեցեղենի կտորներ եւ այրված ոսկորների մանր բեկորներ, ինչպես նաեւ փայտածուխ եւ մի թաս, որը, ինչպես ենթադրում են գիտնականները, կարող էր միջատներին վախեցնող հարմարանք լինել: