Իրանի ԱԳՆ-ն հերքում է Ռուսաստան ԱԹՍ-ներ ուղարկելու մասին լուրը՝ դրանք անհիմն անվանելով, գրում է Mehr-ը։
«Իրանի Իսլամական Հանրապետությունն անհիմն է համարում Ռուսաստանին անօդաչու թռչող սարքերի մատակարարումների մասին տեղեկություններն ուկրաինական պատերազմում օգտագործելու համար եւ չի հաստատում դրանք»,-ասել է Իրանի ԱԳՆ խոսնակ Նասեր Քանանին։
«Հակամարտության հենց սկզբից մենք միշտ հայտարարել ենք մեր սկզբունքային եւ հստակ քաղաքականության մասին՝ հիմնված ակտիվ չեզոքության եւ պատերազմի մերժման եւ հակամարտության քաղաքական լուծման անհրաժեշտության վրա»,-ասել է նա։
Խոսելով ԼԺՀ-ի, ԴԺՀ-ի, Զապորոժիեի եւ Խերսոնի շրջաններում անցկացված հանրաքվեի մասին՝ Քանանին նշել է, որ Թեհրանը՝ հիմնվելով իր սկզբունքային դիրքորոշումների վրա, ընդգծում է այլ երկրների տարածքային ամբողջականության սկզբունքի լիակատար հարգման անհրաժեշտությունը՝ որպես միջազգային իրավունքի հիմնարար կանոն։
Նա ափսոսանք է հայտնել ՆԱՏՕ-ի սադրանքների արդյունքում սկսված հակամարտության շարունակման համար։ «Իրանի Իսլամական Հանրապետությունն աջակցում է ուկրաինական հակամարտության խաղաղ կարգավորմանն ուղղված ցանկացած ջանքերի եւ մշտապես հայտարարում է, որ պատրաստակամ է օգնել եւ նպաստել այդ գործընթացին»,-եզրափակել է Քանանին։