Ես կընդունեի ընդդիմության քննադատությունը, եթե իրենք գային, մի բան անեին, ասեին՝ մենք անում ենք, դուք չեք աջակցում, բայց եթե իրենք գործի չեն գալիս, ի՞նչ իրավունք ունեն ասեն, որ մենք ոչինչ չենք անում։ Այս մասին այսօր՝ ԱԺ-ում լրագրողների հետ ճեպազրույցի ընթացքում ասաց իշխող խմբակցության պատգամավոր Արման Եղոյանը:

«Իսկ եթե քաղաքական բոյկոտ են անում, ուրեմն չպետք է բողոքեն ԱԺ-ի նիստերի կարճ լինելուց: Եթե բոյկոտ ես անում, այդքան մասով աշխատանքը կանգնում է: Ո՞նց կարող է ԱԺ-ում ճգնաժամ լինի, եթե իրենք չկան, այսինքն ում մեջ պետք է ճգնաժամ լինի: Դեռ լավ է, հիմա միջազգային հարթակներում են սկսել կամաց-կամաց գալ: Առաջ դա էլ չէին անում:  Բա էլ բոյկոտը ո՞րն է, այսինքն միջազգային հարթակները չեն բոյկոտում, մեր բոլորի հարթակն են բոյկոտո՞ւմ:

Իրոենք իրավիճակին համապատասխան նախագիծ են բերել, չի քննարկվե՞լ: Այսինքն նախագիծ, որ ասեն՝ շատ հրատապ, շատ կարեւոր հարց պետք է լուծի, բայց չի քննարկվել: ԱԺ-ն դեբատի, գաղափարներ գեներացնելու, օրենքներ ընդունելու մարմին է: Հիմա ի՞նչ նախագիծ են բերել, որ չի քննարկվել»,-ասաց նա:

Երբ լրագրողները հիշեցրին, որ ընդդիմությունը մի քանի հայտարարության նախագիծ է ներկայացրել, որոնք ԱԺ-ում չեն էլ քննարկվել, Եղոյանն ասաց, որ դա վաղուց է եղել եւ դա օրենքի նախագիծ չէ. «Իսկ երբ մենք հայտարարության նախագիծ ներկայացրեցինք, իրենք եկա՞ն, քննարկեցի՞ն, առաջարկեցի՞ն՝ մի բան ավելացնենք, հանենք»:

Հիշեցմանը, որ ընդդիմությունն առաջարկել էր փոփոխություններ անել այդ նախագծում, Եղոյանն արձագանքեց. «Իրենց ո՞ր առաջարկներն են մերժվել, այն առաջարկը, որը վերաբերում էր մեր ներքաղաքական օրակարգին, իշխանության քննադատությանը: Մենք միջազգային հանրությանն ուղերձ ենք հղում, ու դրա մեջ ներառում ենք մեր ներքաղաքական խնդիրնե՞րը: Դա ճի՞շտ է: Միջազգային հանրությանն ուղղված հայտարարության մեջ ինչու՞ պետք է ներառվեն ներքաղաքական հարցեր: Որ գան մեր ներքաղաքական հարցերով զբաղվե՞ն: Մենք միջազգային հանրությանն ենք դիմում եւ պետք է միահամուռ դիմենք: Մենք մեր ձայնը պետք է կենտրոնացնենք Ադրբեջանի դե՞մ, թե՞ կենտրոնացնենք իրար դեմ»: