Թուրքիան կարծում է, որ Շվեդիան եւ Ֆինլանդիան դեռ չեն կատարել ՆԱՏՕ-ին անդամակցելու համար Անկարայի բոլոր պայմանները։ Թուրքիայի արտգործնախարար Մեւլութ Չավուշօղլուի խոսքով՝ երկու երկրներն էլ դեռ պետք է կոնկրետ քայլեր ձեռնարկեն։
Ստամբուլում ՆԱՏՕ-ի գլխավոր քարտուղար Յենս Սթոլթենբերգի հետ կայացած մամուլի ասուլիսում Չավուշօղլուն նշել է, թե Անկարան նկատել է, որ Շվեդիայի նոր կառավարությունը՝ վարչապետ Ուլֆ Քրիստերսոնի գլխավորությամբ, վճռական մոտեցում է ցուցաբերում պարտավորությունների կատարմանը։
Հունիսին Շվեդիան եւ Ֆինլանդիան ստորագրել են հուշագիր, որի շնորհիվ Թուրքիան հանել է վետոն դաշինքին միանալու երկու երկրների հայտերի վրայից: Թուրքիան առաջ է քաշել մի շարք պայմաններ, այդ թվում՝ քուրդ այլախոհների արտահանձնումը, որոնց «ահաբեկիչներ» է համարում։
Նշենք, որ Թուրքիան եւ Հունգարիան դեռ չեն վավերացրել ՆԱՏՕ-ին անդամակցելու երկու երկրների հայտերը։
Չավուշօղլուն վստահեցրել է, որ Անկարան «չի արգելակի» դաշինքում նոր անդամներ ընդունելու գործընթացը, սակայն կարծում է, որ Ֆինլանդիան ու Շվեդիան բավականաչափ չեն կատարել խոստումները, եւ Անկարան ակնկալում է նրանց կողմից ստանձնած բոլոր պարտավորությունների կատարում։
Մինչդեռ Սթոլթենբերգը կարծում է, որ Շվեդիան եւ Ֆինլանդիան բավարարել են ՆԱՏՕ-ին անդամակցելու Թուրքիայի պահանջները, եւ եկել է դաշինքում նրանց ողջունելու ժամանակը։ «Այս վտանգավոր ժամանակներում կարեւոր է ավարտել նրանց անդամակցությունը՝ Մոսկվայի կողմից թյուրիմացություններից կամ սխալ հաշվարկներից խուսափելու համար»,- ասել է նա՝ նշելով, որ այդ հարցը կքննարկի նախագահ Ռեջեփ Թայիփ Էրդողանի հետ հանդիպման ժամանակ։