ՄԱԿ-ը հրապարակել է Իրաքի քրիստոնյա բնակչության դեմ «Իսլամական պետության» գործած հանցագործությունների ապացույցները, հայտնում է ամերիկյան ABC հեռուստաալիքը։

Նշվում է, որ ՄԱԿ-ի քննչական խմբի զեկույցում  Իրաքի քրիստոնյաների դեմ արձանագրվել են ունեցվածքի բռնագրավման, սեռական բռնության եւ ստրկության դեպքեր։ Զեկույցի համաձայն՝ հանցագործությունները հիմնականում կատարվել են Իրաքի հյուսիսում՝ Մոսուլայի շրջակայքում, որտեղ ապրում է երկրի քրիստոնեական համայնքը։

ՄԱԿ-ում ընդգծել են, որ այս դեպքերը կանոնավոր բնույթ են կրում 2014 թվականից, երբ ԻՊ զինյալները գրավել էին Իրաքի տարածքի մոտ մեկ երրորդը։

Նշվում է, որ, չնայած 2017 թվականին ահաբեկչական կազմակերպության դեմ տարած հաղթանակի մասին Իրաքի իշխանությունների հայտարարությանը, զինյալները կարողացել են երկրում անկլավներ պահպանել եւ շարունակում են հանցագործություններ կատարել։