Դեկտեմբերի 9-ին Ազգային ժողովի արտահերթ նիստում վավերացվել են երկու վարկային համաձայնագրեր։
Հատկացված միջոցները նախատեսվում է ուղղել պետական բյուջեի դեֆիցիտի ֆինանսավորմանը։
Խոսքը Հայաստանի Հանրապետության եւ Զարգացման ասիական բանկի միջեւ 2022թ. նոյեմբերի 17-ին ստորագրված «Ֆինանսահարկային ծրագրի կայունության եւ ֆինանսական շուկաների զարգացման ծրագիր» վարկային համաձայնագրի վավերացման եւ 2022թ. նոյեմբերի 17-ին Հայաստանի Հանրապետության կառավարության եւ Զարգացման ֆրանսիական գործակալության միջեւ ստորագրված N САМ 1016 01 վարկային համաձայնագրի վավերացման մասին է։
Զարգացման ասիական բանկի վարկը կտրամադրվի 12 տարի ժամկետով։ Դրանցից 3 տարին՝ արտոնյալ։ Ընդ որում՝ միջոցների 30 տոկոսը լինելու է դրամաշնորհային։
Զարգացման ֆրանսիական գործակալությունը նույնպես վարկ է տրամադրում։ Խոսքը 100 մլն եվրոյի մասին է։ Վարկի վերադարձման ժամկետը 20 տարի է։ Արտոնյալ ժամկետը՝ 5 տարի։
Նախագծի շրջանակում, մասնավորապես, ընդգրկված են.
- Ֆիսկալ պլանավորման, ինչպես նաեւ պետական ծախսերի արդյունավետության, թափանցիկության, ռիսկերի կառավարման բարձրացումը,
- Պետական ներդրումների, ներառյալ պետություն-մասնավոր հատված գործընկերության համակարգի բարեփոխումները,
- Պետական գնումների համակարգի արդիականացումը,
- «Կանաչ» տնտեսության քաղաքականության մշակումը, կլիմայի փոփոխություններին հարմարվելու խթանումը եւ «կանաչ» ֆինանսական գործիքների օգտագործման ընդլայնումը,
- Պետական պարտքի կառավարման համակարգի կատարելագործումը,
- Ֆինանսների եւ կապիտալի շուկաների զարգացումը,
- Կորպորատիվ թափանցիկության ընդլայնումը հաշվապահական հաշվառման եւ ֆինանսական կարգավորման իրավանորմատիվային բազայի վերանայման ճանապարհով։
Կառավարության Զարգացման ասիական բանկի նախաձեռնությանը «կողմ» է եղել 59 պատգամավոր։ «Դեմ»՝ 26։ Զարգացման ֆրանսիական գործակալության վարկին «կողմ» է եղել 63 պատգամավոր, «դեմ»՝ 27։