Ամերիկացի սենատոր Մայքլ Բենեթը հինգշաբթի նամակ է ուղարկել Apple-ի գլխավոր տնօրեն Թիմ Կուկին եւ Google-ի գլխավոր տնօրեն Սունդար Պիչայիին՝ կոչ անելով TikTok-ին հեռացնել իրենց հավելվածների խանութներից՝ վկայակոչելով այն մտահոգությունները, որ TikTok-ը մշակում է ԱՄՆ օգտատերերի տվյալները, հաղորդում է ABC News-ը:
«Ինչպես սոցիալական ցանցերի մեծ մասը, TikTok-ն ընդարձակ եւ բարդ տվյալներ է հավաքում իր օգտատերերից: Ի տարբերություն սոցիալական ցանցերի մեծամասնության, Tik Tok-ը յուրահատուկ խնդիր է կատարում»,- ասել է Բենեթը: «TikTok-ի հսկայական ազդեցությունը եւ տվյալների ագրեսիվ հավաքագրումը հատուկ վտանգ է ներկայացնում ԱՄՆ ազգային անվտանգության համար՝ կապված չինական օրենսդրությամբ նրա մայր ընկերության պարտավորությունների հետ»:
TikTok-ը, որն ամսվա մեջ ունի ավելի քան 100 միլիոն ակտիվ օգտատեր ԱՄՆ-ում, բախվում է ամերիկյան իշխանությունների աճող վերահսկողությանը, որոնք մտահոգված են հարթակի օգտատերերի տվյալների անվտանգությամբ:
Դեկտեմբերին Կոնգրեսն արգելել է Tik Tok-ը դաշնային կառավարությանը պատկանող բոլոր սարքերում: Tik Tok-ի գլխավոր տնօրեն Շոու Ցզու Չուն մարտին պետք է ներկայանա Ներկայացուցիչների պալատի էներգետիկայի եւ առեւտրի հանձնաժողով՝ ընկերության տվյալների պաշտպանության պրակտիկայի հետ կապված, երկուշաբթի օրը հայտնել են հանձնաժողովը:
ԱՄՆ նահանգների կեսից ավելին քայլեր է ձեռնարկել Tik Tok-ը պետական սարքերում մասնակի կամ ամբողջությամբ արգելելու համար։
TikTok-ը հայտարարել է, որ ամերիկյան օգտատերերի տվյալները պահում է Չինաստանի սահմաններից դուրս եւ Չինաստանի կառավարության խնդրանքով երբեք չի հեռացրել ամերիկյան հաղորդագրությունները հարթակից:
Google-ն ու Apple-ը դեռ չեն մեկնաբանել այս տեղեկատվությունը։
«Ցավոք, սենատոր Բենեթի նամակը գրեթե բացառապես հիմնված է TikTok-ի մասին մոլորեցնող տեղեկությունների վրա»,- ասվում է TikTok-ի հայտարարության մեջ, որն ուղարկվել է ABC News-ին:
«Դա նաեւ անտեսում է այն զգալի ներդրումները, որոնք մենք կատարել ենք Project Texas-ի շրջանակներում, ծրագիր, որը համաձայնեցվել է մեր երկրի ազգային անվտանգության առաջատար փորձագետների հետ՝ մեր համայնքին իրենց տվյալների անվտանգության եւ TikTok պլատֆորմի ամբողջականության վերաբերյալ լրացուցիչ երաշխիքներ տրամադրելու համար»,- հավելել են ընկերությունից։
«Մենք հիասթափված ենք, որ շատ պետական կառույցներ, գրասենյակներ եւ համալսարաններ այլեւս չեն կարողանա օգտագործել TikTok-ը՝ համայնքներ կառուցելու եւ ընտրողների հետ կապ հաստատելու համար»,- ասել է ընկերությունը:
Հունիսին Buzzfeed-ը հայտնել էր, որ Չինաստանում գործող TikTok-ի ինժեներները հասանելիություն են ստացել ԱՄՆ օգտատերերի անձնական տվյալներին, օրինակ՝ հեռախոսահամարներին: Հոկտեմբերին Forbes-ը հայտնել էր, որ TikTok-ի մայր ընկերություն ByteDance-ը մտադիր է հավելվածն օգտագործել որոշ օգտատերերի մասին տեղեկություններ ստանալու համար:
Դոնալդ Թրամփի վարչակազմը փորձել էր արգելել TikTok-ը 2020 թվականին՝ ի վերջո կոչ անելով ByteDance-ին վաճառել հավելվածը ամերիկյան ընկերությանը։ Սակայն վաճառքը այդպես էլ տեղի չունեցավ։