Ադրբեջանը նպատակ է դնում Արցախից ամբողջությամբ վտարել հայերին։ Այս մասին հայտարարել է Արցախի նախագահի հատուկ հանձնարարությունների գծով խորհրդական-ներկայացուցիչ Դավիթ Բաբայանը՝ NEWS.am-ի թղթակցի խնդրանքով մեկնաբանելով Բաքվից հերթական «հրավերը»։
«Մենք հերթական անգամ տեսնում ենք «Ղարաբաղի հասարակության» հրավերը։ Հասկանալի է, որ ոչ մի հավասար երկխոսության, առավել եւս բանակցությունների մասին խոսք լինել չի կարող։
Նախ, ինչ է նշանակում Ղարաբաղի հասարակություն։ Ո՞վքեր են այդ մարդիկ։ Ո՞վ է նրանց ընտրելու։ Ո՞վ է նրանց ուղարկելու։ Բանակցություններ կարող են լինել հավասարների միջեւ։ Երկխոսություն կարող է լինել հավասարների միջեւ: Ադրբեջանը մեզ ոչ միայն հավասար չի ճանաչում, այլեւ ընդհանրապես չի ճանաչում Արցախի գոյությունը։ Նրանց նպատակը շատ պարզ է․ որպեսզի ոչ մի հայ չմնա։ Իսկ եթե ինչ-որ մեկն էլ մնա, ապա բացառապես որպես թանգաանի ցուցանմուշ։ Ասենք՝ սաֆարի պարկում, եթե ոչ համակենտրոնացման ճամբարում։ Բաքուն արդեն փորձ ունի․ ռազմական ավարի այգու օրինակով փորձել ստեղծել ռազմական ավարի սաֆարի պարկ։ Չի բացառվում, որ այգում գտնվողներին որսալու իրավունքով․․․
Բնականաբար, նման համատեքստում մեզ համար ցանկացած հանդիպում ու քննարկումներն անընդունելի են։ Բանակցություններն, ինչպես արդեն ասացի, կարող են լինել հավասար հիմքերով եւ երրորդ կողմերի մասնակցությամբ։ Ռուսաստանը, ԵԱՀԿ Մինսկի խմբի մյուս համանախագահները չեն կարող հանդիպումների մասնակիցներ չլինել։
Իսկ լրատվամիջոցներով ներկայացված Բաքվի առաջարկներում ենթադրվում է ոչ ավելին, քան «մայր Ադրբեջանի» երկխոսությունը ինչ-որ ապստամբների, աբորիգենների հետ, որոնք ընդունելով իրենց մեղքը, գնում են ապաշխարելու, ընդունում են իրենց սխալը եւ եկել են ծնկաչոք աղաչելու, որպեսզի կամ թույլ տան գնալ կամ ապրել որպես սաֆարի պարկի ցուցանմուշ։
Բացի այդ Բաքվում կրկնվող «ինտեգրացիա» բառը ենթադրում է իրավահավասարություն, կամավորություն, փոխշահավետ նախագծեր։ Վերը թվարկվածներից որեւէ մեկը մենք չենք տեսնում: Անգամ ակնարկ, նույնիսկ ընդառաջ քայլ, նույնիսկ հարաբերությունները կարգավորելու փորձ»,- եզրափակել է Դավիթ Բաբայանը։
Մարիամ Լեւինա