«Բուլավա» ծովային ռազմավարական ուժերի համալիրը կներառվի սպառազինությունում: Այս մասին դեկտեմբերի 27-ին սպայական բարձրագույն կազմի հետ հանդիպման ընթացքում հայտնել է Ռուսաստանի նախագահ Դմիտրի Մեդվեդեւը:
Նա հայտնել է, որ տիեզերահրթիռային ոլորտի առկա խնդիրների պայմաններում կարեւոր քայլ է արվել. ավարտվել են ծովային ռազմավարական միջուկային «Բուլավա» ուժերի ժամանակակից համալիրի փորձարկումները, տեղեկացնում է «ՌԻԱ Նովոստի»-ն:
Ծովային հիմքով միջմայրցամաքային բալիստիկական «Բուլավա» հրթիռի փորձարկումները սկսվել էին 2004թ.: 18 մեկնարկից 11-ը հաջող է ընթացել: Ամենահաջողվածը 2011թ. է եղել. բոլոր 4 փորձարկումները բարեհաջող են ավարտվել եւ կատարվել են «Յուրի Դոլգոռուկի» սուզանավակից:
«Յուրի Դոլգոռուկի»-ն դեկտեմբերի 23-ին երկու «Բուլավա» հրթիռների հաջող մեկնարկի համազարկ է տվել: Միջմայրցամաքային բալիստիկական «Բուլավա» հրթիռը հետագայում պետք է դառնա Ռուսաստանի ծովային ռազմավարական միջուկային ուժերի հիմքը, այդ հրթիռի համար արդեն նոր սուզանավակներ են հատկացվել: