Թեղուտի պաշտպանության նախաձեռնությունն սկսում է նոր տեսանյութերի շարք. «Թեղուտը հայտնիների աչքերով»:

Այս կապակցությամբ, նախաձեռնությունը հաղորդագրություն է տարածել, որում, մասնավորապես, ասվում է.

«Մեր հանդիպումները հայտնի մարդկանց հետ շարունակվում են: Նրանցից շատերը, իմանալով մեր նախաձեռնության մասին, մեծ սիրով համաձայնվեցին իրենց կարծիքն արտահայտել Թեղուտում կատարվող խայտառակության եւ սպասվելիք աղետի մասին: Մենք ակնկալում ենք, որ մեր շարքերը կհամալրվեն գաղափարակից նոր մարդկանցով, նոր հայտնի դեմքերով: Մենք սպասում ենք ձեր արձագանքներին եւ վստահ ենք, որ հաղթանակն անխուսափելի է»:

Այնուհետեւ ներկայացվում է հայտնի մարդկանց խոսքը Թեղուտում կատարվողի վերաբերյալ:

Սոս Սարգսյան. «Լոռին Հայաստանի գոհարն է, Թեղուտի անտառը Լոռվա գոհարն է: Վերջապես մենք պետք է ունենանք մի անարատ անկյուն, բնական, կուսական: Եղած անտառը բռնենք ոչնչացնենք, նշանակում է ինքներս մեզնից մի մեծ գողություն անենք, ինքներս մեզ աղքատացնենք, ինքներս մեզ չորացնենք»:

Երվանդ Մանարյան. «Իմ կարծիքով բնապահպանական այս մեծ խնդիրը նոր աշխարհին, 21-րդ դարին ինտեգրվելու ամենահուսալի կամուրջն է: Այդ շարժումը գնալով ավելի խոր արմատներ կձգի...Կարծում եմ` ապագա սերունդները մեծապես շնորհակալ կլինեն առաջամարտիկներին այդ մեծ, կարեւորագույն շարժումը սկսելու համար»:

Ֆորշ. «Երբ որ մարդն ապրում է, ապրելու համար ինչ է հարկավոր` օդ, թթվածին: Իսկ օդն ու թթվածինը ի՞նչն է առաջացնում. բնություն, բուսականություն, կանաչը, անտառը: Ճիշտ է մոլիբդենն էլ է լավ, բայց մոլիբդեն շնչելով մարդ չի կարող ապրել»:

Աշոտ Ադամյան. «Ընդհանուրի չգիտակցելը, որ դա վնասակար է ժողովրդին, հետեւաբար վնասկար է պետականությանը, սա պարզապես անգրագիտության դրսեւորում է: Հետեւաբար, ցանկացած ոտնձգություն մեր էկոլոգիական համակարգին, ես համարում եմ թշնամական եւ վնասակար, եւ ժողովրդի , եւ պետականության համար»:

Տիգրան Խզմալյան. «Մենք պաշտպանում ենք Թեղուտը մեր երեխաների համար: Մենք ստացել ենք մեր հայրերից թեկուզ փոքրացած, թեկուզ վիրավորված, բայց դրախտ: Իրավունք չունենք եւ թույլ չպիտի տանք, որ մեր դրախտը դժողք դարձնեն»:

Եգոր Գլումով. «Եթե մենք չունենանք մեծ ու փոքր հաղթանակներ, վաղը մեր բալիկների աչքերին չենք կարողանա նայել, որովհետեւ մեր բալիկները կապրեն մի երկրում, որտեղ չի լինի կանաչ ծառ, մաքուր ջուր, կենդանիներ, բնություն, ներկա, ապագա եւ անցյալ»:

Սերգեյ Դանիելյան. «Ես ավելի քան համոզված եմ, որ փողը մենք չենք կարա ուտենք, շնչենք, խմենք, եթե մենք վերացնում ենք այն ամենն, ինչը մեզ շրջապատում է, մենք այլեւս այդ փողը ծախսելու տեղ չենք ունենա, ուղակի:"

Մկրտիչ Արզումանյան (Մկո). "Դա հրեշավոր որոշում է, ոչ մի նորմալ, 21-րդ դարում ապրող, իրեն հարգող պետություն չի կարող դա իրեն թույլ տալ: Սա շատ կարեւոր խնդիր է , ամեն ինչ պետք է անել, որ այս խնդիրը լուծվի ի ուգուտ բնության»:

Աննա Մայիլյան. «Ոչնչացնելով անտառները, մենք սկիզբ ենք դնում ինքներս մեր ոչնչացմանը: Սա քննություն է, կարծումեմ այս քննությունը պետք է պատվով կրել: Ինչ որ անում ենք, թող լինի Աստծո հովանավորությամբ: մենք ընտրյալ ազգ ենք, Աստված պետք մեզ օգնի, որ մենք սխալ քայլերի չդիմենք»: