Ստրասբուրգում, ապրիլի 23-ից 27-ը, կայանալու է Եվրոպայի Խորհրդի խորհրդարանական վեհաժողովի գարնանային նստաշրջանը, որտեղ իր պատրաստած զեկույցն է ներկայացնելու նաեւ «Ժառանգություն» խմբակցության պատգամավոր Զարուհի Փոստանջյանը:
Պատգամավորը ներկայացնելու է «Համացանցում եւ օնլայն մեդիաներում արտահայտվելու եւ տեղեկատվության ազատության պաշտպանությունը» զեկույցը (Փաստաթուղթ 12874):
NEWS.am-ի թղթակցի հետ զրույցում Զարուհի Փոստանջյանը նշեց. «Այսօր, ժամանակակից աշխարհում շատ կարեւոր է էլեկտրոնային մեդիաների ազատությունը: Եւ իմ զեկույցն ու բանաձեւի նախագիծը վերաբերում են այդ ոլորտի լրատվամիջոցների ազատությանը: Այդ ոլորտում ոչ թե պետք է սահմանափակումներ մտցվեն, այլ խրախուսվեն ազատությունները, հատկապես նոր տեխնոլոգիաների, Facebook-ի եւ սոցիալական այլ ցանցերի աշխատանքի խրախուսմանը»:
ԵԽԽՎ պաշտոնական կայքում նշված է, որ զեկույցը կներկայացվի ապրիլի 25-ին, սակայն չի բացառվում, որ ապրիլի 23-ին ԵԽԽՎ Բյուրոյի նիստի արդյունքում որոշակի ճշգրտումներ արվեն: