Boston Dynamics ընկերությունը ներկայացրել է Sand Flea (ավազի լու) անվանումով ռոբոտը, որի վրա տեսախցիկ կա: Ռոբոտը շարժվում եւ կառավարվում է ինչպես սովորական խաղալիք ավտոմեքենան` հեռակառավարմամբ:
Անհրաժեշտության դեպքում «լուն» ունակ է թռչել մինչեւ 8-9 մետր, որը նրան դարձնում է խուզարկու սարք` քաղաքային պայմաններում:
Թռիչքի ժամանակ օպերատորը կարող է կարգավորել ստարտի անկյունը եւ թռիչքի բարձրությունը (մեկ մետրից մինչեւ առավելագույն բարձրությունը), հաղորդում է «Մոսկոսվսկի կոմսոմոլեցը»: Արդեն օդում «ավազի լուն» օգտագործում է կայունացման գիրոսկոպիկ համակարգ, որպեսզի չափազանց քաոսային կերպով չպտտվի եւ ապահովի ընդունելի պատկեր տեսախցիկի համար: Հետախույզը վայրէջք կարող է կատարել ցանկացած կողմի վրա` ամուր անիվները նվազեցնում են հարվածը: