Հայաստանի ճանապարհներին մի շարք ավտովթարներ են եղել:
Ոստիկանության լրատվական վարչությունից հայտնում են, թե ապրիլի 1-ին, ժամը 01.15-ին, «ՎԱԶ-21010» մակնիշի ավտոմեքենան Աշտարակի խճուղում բախվել է էլեկտրասյանը, ինչի հետեւանքով վարորդը եւ 2 ուղեւորները մարմնական վնասվածքներով տեղափոխվել են հիվանդանոց:
Նույն օրը, ժամը 7-ի սահմաններում, «ՎԱԶ-2107» մակնիշի ավտոմեքենան Աշտարակ-Երեւան ճանապարհի 1-ին կմ-ին, նոր կամրջի վրա, բախվել է կամրջի պաշտպանիչ վահանակներին:
Վարորդը մարմնական վնասվածքներով տեղափոխվել է հիվանդանոց:
Ժամը 21-ի սահմաններում, «Հոնդայի Լանդրա» մակնիշի ավտոմեքենան Սեւան-Մարտունի-Գետափ ճանապարհի 59-րդ կմ-ին վրաերթի է ենթարկել 50-ամյա մի տղամարդու, որը մարմնական վնասվածքներով տեղափոխվել է Մարտունու հիվանդանոց:
Իսկ ժամը 22-ի սահմաններում, «ՎԱԶ-2121» մակնիշի ավտոմեքենան Տավուշի մարզի Գանձաքար գյուղում դուրս է եկել ճանապարհի բանուկ մասից եւ բախվել էլեկտրասյանը, ինչի հետեւանքով վարորդը եւ ուղեւորը մարմնական վնասվածքներով տեղափոխվել են հիվանդանոց:
Ապրիլի 2-ին, ժամը 00.05-ի սահմաններում, Սպիտակ-Վանաձոր ճանապարհի 5-րդ կմ-ին իրար են բախվել «ՎԱԶ-2121» եւ «Մերսեդես-Բենց» մակնիշի ավտոմեքենաներ:
Բախման հետեւանքով վարորդները մարմնական վնասվածքներով տեղափոխվել են հիվանդանոց:
Բոլոր դեպքերով կատարվում է քննություն: