Մաշտոցի պուրակում կրպակների ապամոնտաժման աշխատանքները նախաձեռնող առաջին խումբը հանդես է եկել հայտարարությամբ, որտեղ նշել է, որ ապրիլի 3-ին, ժամը 13:00-ին լրանում է պատկան մարմիններից իրենց պատասխանելու վերջնաժամկետը:
Հայտարարությունում ասվում է.
«Մարտի 31-ին, ժամը 13.00-ին, Մաշտոցի պուրակում ոստիկանության բարձրաստիճան ղեկավարները պաշտոնապես հայտնեցին, որ ոստիկանությունը իրավասու չէ կասկածի տակ դնելու տեղական ինքնակառավարման մարմնի որոշման եւ փաստացի կատարված շինարարական աշխատանքների իրավաչափությունը։
Բազմաթիվ լրատվամիջոցների ներկայությամբ մենք կոչ արեցինք Հայաստանի պետական մարմիններին, ովքեր իրավասու են կասկածի տակ դնել տեղական ինքնակառավարման մարմնի որոշումը եւ փաստացի կատարված շինարարական աշխատանքների իրավաչափությունը՝ եռօրյա ժամկետում հանդես գալ հրապարակային հայտարարությամբ եւ ուղարկել Մաշտոցի պուրակ լիազորված ներկայացուցիչներին հանրությանը բացատրություններ տալու համար ինքնակամ շինությունների վերաբերյալ։
Ապրիլի 3-ին ժամը 13։00-ին լրանում է այս հարցում իրավասու պետական մարմնին հայտնաբերելու համար Հայաստանի իշխանություններին տրամադրված ողջամիտ ժամկետը։ Եթե մինչեւ նշված ժամկետի լրանալը ոչ մի իրավասու պետական մարմին ի հայտ չգա, մենք կհամարենք, որ հանրության ներկայացուցիչների լսված լինելու իրավունքը վերջնականապես մերժված է իշխանությունների կողմից:
Եվս մեկ անգամ տեղեկացնում ենք Հայաստանի իշխանություններին` որ նման դեպքում ոստիկանությունը չի կարողանա խոչընդոտել Մաշտոցի պուրակում մեր արդար աշխատանքի իրականացմանը։ Միաժամանակ հորդորում ենք բոլորին ընդունել, որ սեփականությունը մեր երկրում պետք է պաշտպանվի օրենքով, այլ ոչ թե ոստիկանների կամ այլոց ֆիզիկական ուժի միջոցով։
Հիշեցնում ենք, նաեւ մեր այն հայտարարությունը, որ եթե Հայաստանի իշխանությունները համարում են Մաշտոցի պուրակում կառուցված շինությունները օրինական սեփականություն, ապա պատրաստ ենք այդ շինությունները ապամոնտաժելու մասին մեր ընդունած գիտակից որոշման համար կրել օրենքով նախատեսված պատասխանատվությունը»: