Թերթը գրում է, որ «Գրանդ Հոլդինգի» մամուլի հարցերով պատասխանատու Վահրամ Բրուտյանը պարզաբանել է, թե ինչու այս ընտրություններում չեն առաջադրվել «Գրանդ Հոլդինգ» ընկերության սեփականատեր Հրանտ Վարդանյանի երկու որդիները` Կարեն եւ Միքայել Վարդանյանները: «Ըստ պրն Բրուտյանի, Վարդանյաններն այս անգամ որոշել են իրենց փոխարեն առաջիկա խորհրդարանական ընտրություններում առաջադրել իրենց ձեռնարկությունների գործադիր տնօրեններին, ովքեր լիովին ազատ կլինեն այլ աշխատանքից եւ կկարողանան ամբողջությամբ նվիրվել օրենսդրական աշխատանքին: 5-րդ գումարման խորհրդարանում նրանց գործունության գերխնդիրը լինելու են հայրենական արտադրության եւ երկրի տնտեսության զարգացման շահերը: Այս աշխատանքը Վարդանյանները վստահել են իրենց տնօրեններին, քանի որ իրենք գերզբաղված են` առաջիկա տարիների համար նախատեսված բազմաթիվ բիզնես-ծրագրերով: Վարդանյան եղբայրները մոտակա հինգ տարում պլանավորել են մի քանի հազար նոր աշխատատեղեր ստեղծել Հայաստանում: Նման ծանրաբեռնվածությունը հնարավոր չէ համատեղել խորհրդարանական աշխատանքի հետ: Ահա սա է նման որոշման պատճառը: Ի դեպ, հատկանշական է, որ թիվ 40 ընտրատարածքում, որտեղից ընտրվել էր Միքայել Վարդանյանը, մեծամասնական ընտրակարգով որեւէ կուսակցական թեկնածու այս տարի չի առաջադրվել»,- գրում է «Ազգ»-ը:
