Բժշկական ապահովագրությունը պետք է անվճար լինի պակաս ապահովված քաղաքացիների համար: Այդ մասին բուժծառայության ոլորտի աշխատակիցների հետ հանդիպմանն ասացին ՀՅԴ նեկայացուցիչները: Համաձայն կուսակցության նախընտրական ծրագրի`  բժշկական ապահովագրության չափը պետք է աճի ըստ անձնական եկամուտի:  Բացի այդ, սոցիալական փաթեթի բժշկական ահովագրությունը պետք է տարածել նաեւ  բուհական համակարգի եւ առողջապահության ոլորտի (պոլիկլինիկաների) վրա:

Ինչպես նշեց ՀՅԴ անդամ  Դավիթ Լոքյանը, ներկայումս կուսակցությանը մտահոգում է բուժծառայությունների նկատմամբ հայրենիքում պահանջարկի նվազումը: «Հնարավորության դեպքում ավելի շատ քաղաքացիներ են նախընտրում հետազոտվել եւ բուժում ստանալ արտերկրում: Ձեր օգնությամբ մենք ցանկանում ենք քաղաքացիներին տեղեկացնել մեր բուժծառայության իրական որակի մասին»,-հայտարարեց Լոքյանը:

Նրա խոսքով` ոլորտի համար կարող է եկամուտ ապահովող միջոց լինել կորպորատիվ ապահովագրությունը, որը դեռեւս տարածված չէ Հայաստանում: Առողջապահությանը հատկացվող բուջետային միջոցներն էլ, տնտեսությունը «ստվերից» դուրս հանելու եւ հարկերի հավաքագրման մակարդակի բարձրացման շնորհիվ,  կարելի է ավելացնել եռակի` ներկայիս  65 մլրդ դրամի համեմատ:

ԱԺ պատգամավոր Արծվիկ Մինասյանն էլ նշեց, որ ծրագրվում է  4 անգամ ավելացնել բուժաշխատողի միջին աշխատավարձը` հասցնելով մինչեւ 500 հազ. դրամի: