նախընտրելի դարձնելՄենք կորցրել ենք ոչ միայն 1.5 միլիոն հայերի, այլեւ մի ամբողջ հայրենիք, քաղաքակրթություն, մշակույթ ժառանգություն եւ դրա համար Ծիծեռնակաբերդ գալով հարգանքի տուրք ենք մատուցում մեր զոհերին: Այս մասին, այսօր` ապրիլի 24-ին, Ծիծեռնակաբերդ այցելության ժամանակ լրագրողների հետ զրույցում ասաց «Ժառանգություն» կուսակցության առաջնորդ Րաֆֆի Հովհաննիսյանը եւ ավելացրեց, որ ամեն դեպքում առաջ պետք է նայենք: Նա հիշեցրեց, որ շատ երկրներ ճանաչել են Հայոց ցեղասպանության փաստը, ինչը նրանց պատմության եւ արժանապատվության հարցն է:
Րաֆֆի Հովհանիսյանը նկատեց, որ մենք միասին պետք է կառուցենք իրավական, սահմանադրական սկզբունքների վրա հիմնված երկիր, որպեսզի կարողանանք մեր հարցերը բարձրացնել դրսում:
«Այնպիսի փոփոխություններ պետք է անենք, որ մեր երկիրը վերադարձնենք մեր ժողովրդին: Այդ դեպքում մենք կկարողանանք արդարություն հաստատելով տանը` այդ արդարությունը պահանջել նաեւ աշխարհից»,- նշեց «Ժառանգության» առաջնորդը եւ ողջունեց այն թուրքերին, ովքեր օգնել են հայերին փրկվել:
Նա նաեւ ողջունեց այն փաստը, որ Թուրքիայում քաղաքացիական հասարակության մեջ հնչում են Հայոց ցեղասպանությունը ճանաչելու եւ դատապարտելու պահանջներ: Նրա խոսքով, Ցեղասպանության ճանաչման հարցը մեր առանցքային եւ դարակազմիկ հարցերից է, որի համար մենք պետք է կերտենք քաղաքակիրթ պետություն:
«Ժառանգության» մեկ այլ պատգամավոր` Արմեն Մարտիրոսյանն էլ նշեց, որ մոտ ժամանակներս կտեսնենք էական առաջընթաց Հայոց ցեղասպանության ճանաչման ուղղությամբ: Անդրադառնալով հայ թուրքական հարաբերություններին, նա ասաց. «Այդ արձանագրությունները պետք է հետ կանչվեն: Դիվանագիտական հարաբերությունների հաստատումը պետք է լինի առանց նախապայմանների»:
