նախընտրելի դարձնելԻրանցի մասնագետներին հաջողվել է ապակոդավորել ամերիկյան անօդաչու թռչող սարքի տվյալները, որը դեկտեմբերին գրավվել էր Իրանի տարածքում: Այդ մասին հաղորդել է Իրանի Ազգային անվտանգության եւ արտաքին քաղաքականության հարցերով խորհրդարանական հանձնաժողովի նախագահ Ալահէդդին Բորուջերդին:
«Իսլամական հեղափոխության պահապանների գվարդիան հաջողությամբ ապակոդավորել է ամերիկյան RQ Sentinel անօդաչու թռչող սարքի տվյալները: Դա շրջադարձային է Իրանի տեխնոլոգիական հնարավորությունների տեսակետից»,-ասել է նա, հաղորդում է «Ինտերֆաքսը»` հղում անելով իրանական Press-TV հեռուստաալիքին:
Հիշեցնենք, 2011թ. դեկտեմբերի 4-ին Իրանի ՀՕՊ-ի ուժերը գցել էին ամերիկյան RQ Sentinel անօդաչու թռչող սարքը: Ըստ իրանական պետական լրատվամիջոցների` սարքը խփվել էր հատուկ ծառայությունների աշխատակիցների կիբերհարձակման շնորհիվ:
Միաժամանակ արեւմտյան մամուլում լուրեր էին շրջանառվում, որ սարքը գցել են Ռուսաստանից ձեռք բերված «Ավտոբազա» համակարգի օգնությամբ:
ԱՄՆ նախագահ Բարաք Օբաման Իրանի իշխանություններին խնդրել էր վերադարձնել սարքը, սակայն Իրանը մերժել էր` ԱՄՆ-ին մեղադրելով իր օդային տարածք ներխուժելու մեջ:
