նախընտրելի դարձնելՇարունակելով քաղաքացիների հետ ամենօրյա հանդիպումները՝ Երևանից մինչև երկրի հեռավոր ու սահմանամերձ բնակավայրեր, «Բարգավաճ Հայաստան» կուսակցության առաջնորդ Գագիկ Ծառուկյանը այցելեց Գեղարքունիքի մարզ, որտեղ հանդիպում ունեցավ Կարճաղբյուր գյուղի բնակիչների հետ։
Կարճաղբյուրում քաղաքական գործչին դիմավորեցին ավանդույթի համաձայն՝ աղ ու հացով։ Հանդիպման ընթացքում Ծառուկյանը շնորհավորեց բնակիչներին Աշխատանքի օրվա կապակցությամբ՝ ընդգծելով աշխատող մարդու առանցքային դերը պետության զարգացման գործում։
«Հենց աշխատող մարդն է ստեղծում բարիքներ, կառուցում երկիրը և ամրապնդում պետության հիմքերը», — նշեց նա՝ հավելելով, որ անհրաժեշտ է բարձրացնել աշխատավոր մարդու արժևորումն ու հարգանքը։
Ծառուկյանը նաև խոսեց իր կյանքի ուղու մասին՝ ընդգծելով, որ մեծացել է աշխատավոր ընտանիքում.
«Ես ինքս աշխատավորի ընտանիքից եմ։ Մայրս մինչ օրս աշխատում է՝ ամեն առավոտ գնում է աշխատանքի։ Մարդը պետք է զբաղված լինի, ստեղծի, աշխատի։ Ինչքան մարդը զբաղված է, այնքան երկար է պահպանում ակտիվությունն ու առողջությունը»։
Նա ընդգծեց, որ նույնիսկ տարեց տարիքում կարևոր է պահպանել զբաղվածությունը, և պետությունը պետք է դրա համար պայմաններ ստեղծի։
Կուսակցության առաջնորդի խոսքով՝ բնակիչների հետ հանդիպումները կրում են համակարգային բնույթ և անցկացվում են ամբողջ տարվա ընթացքում։ Առանձնահատուկ ուշադրություն է դարձվում սահմանամերձ բնակավայրերին, որոնք, նրա կարծիքով, կարիք ունեն լրացուցիչ աջակցության։
«Սահմանին ապրող մարդիկ հերոսներ են։ Նրանք իրենց ընտանիքներով մնում են այստեղ, ապահովում են անվտանգությունը և միաժամանակ կերակրում երկիրը։ Նրանք կարիք ունեն հատուկ վերաբերմունքի, ուշադրության և աջակցության», — նշեց նա։
Ծառուկյանը կարևորեց նման տարածքների բնակիչների համար արտոնությունների ներդրումը՝ ներառյալ՝ հարկային բեռի նվազեցում, անվճար պարարտանյութերի և սերմերի տրամադրում, գյուղատնտեսական տեխնիկայի ապահովում, պայմանների ստեղծում, որոնք կտարբերվեն մայրաքաղաքային և կենտրոնական շրջաններից։
Հանդիպման ընթացքում բնակիչները բարձրաձայնեցին մի շարք արդիական խնդիրներ՝ ճանապարհների վիճակ, գյուղտեխնիկայի պակաս և ցածր բերքատվություն։
Ծառուկյանը առաջարկեց մարզերում ստեղծել մեխանիզացիայի կենտրոններ, որոնք թույլ կտան ֆերմերներին մատչելի գնով օգտվել տեխնիկայից.
«Չպետք է լինի այնպես, որ տեխնիկան անհասանելի լինի։ Ամեն մարզում պետք է բավարար քանակով տրակտորներ և սարքավորումներ լինեն, որպեսզի մարդիկ կարողանան արդյունավետ մշակել հողը, ցանել և հավաքել բերքը»։
Առանձին անդրադարձ կատարվեց սերմնանյութի որակի խնդրին, մասնավորապես՝ կարտոֆիլի դեպքում.
«Չի կարելի տասնամյակներով նույն սերմն օգտագործել և բարձր բերքատվություն սպասել։ Պետք է ներդնել էլիտար սորտեր, որոնք հարմարեցված են մեր կլիմային, որպեսզի հեկտարից ստանանք 40–50 տոննա, ոչ թե 6–10»։
Քաղաքական գործիչը խոսեց նաև սոցիալական արդարության մասին՝ քննադատելով պետական համակարգում եկամուտների անհամաչափությունը.
«Եթե ուսուցիչը ստանում է 100 հազար դրամ, իսկ նախարարը՝ միլիոնավոր պարգևավճարներ, դա արդար չէ։ Վարձատրությունը պետք է լինի համաչափ և արդար»։
Նա ընդգծեց կառավարման համակարգի բարեփոխման և պետական կառույցների արդյունավետության բարձրացման անհրաժեշտությունը։
Ծառուկյանը ուշադրություն դարձրեց նաև քրեակատարողական հիմնարկների գերբեռնվածությանը և առաջարկեց քննարկել համաներման հնարավորությունը ոչ ծանր հանցագործություններ կատարած անձանց համար.
«Պետք չէ ամեն մանրուքի համար ազատազրկել։ Մարդիկ պետք է հնարավորություն ունենան աշխատել և օգտակար լինել հասարակությանը»։
«Բարգավաճ Հայաստան» կուսակցության առաջնորդը նշեց, որ կուսակցությունը կմասնակցի առաջիկա խորհրդարանական ընտրություններին «Առաջարկ Հայաստանին» ծրագրով, որը մշակվել է մասնագետների մասնակցությամբ և քաղաքացիների առաջարկների հիման վրա։
«Եթե ժողովուրդը մեզ վստահի կառավարումը, մենք կկատարենք բոլոր ծրագրերը հնարավորինս սեղմ ժամկետներում։ Ունենք փորձ, հնարավորություն և ցանկություն», — ընդգծեց նա։
Միաժամանակ Ծառուկյանը նշեց, որ իր հիմնական նպատակը պաշտոնը չէ, այլ երկրի խնդիրների լուծումը.
«Ես չեմ ասում, որ ուզում եմ դառնալ վարչապետ։ Ես հանդիպում եմ մարդկանց հետ, որպեսզի հասկանամ նրանց խնդիրները և առաջարկեմ լուծումներ»։
Այցի ավարտին Ծառուկյանը ծաղիկներ խոնարհեց հայրենիքի համար զոհվածների շիրիմներին՝ ընդգծելով հերոսների հիշատակի պահպանման կարևորությունը.
«Մեր պարտքն է հիշել նրանց սխրանքը և կառուցել այն Հայաստանը, որի մասին նրանք երազել են»։
Կարճաղբյուրի բնակիչները իրենց աջակցությունն արտահայտեցին քաղաքական գործչին՝ նշելով նրա ներդրումը տնտեսության զարգացման, աշխատատեղերի ստեղծման և բարեգործական գործունեության մեջ։
«Նա գործի մարդ է, հայրենասեր, ով օգնում է մարդկանց և երբեք չի մնում անտարբեր», — ասում էին հանդիպման մասնակիցները։
Նրանց խոսքով՝ նման այցերը կարևոր են մարզերի իրական խնդիրները հասկանալու և արդյունավետ լուծումներ գտնելու համար, հատկապես սահմանամերձ համայնքների դեպքում, որոնք շարունակում են կարևոր դեր ունենալ երկրի անվտանգության և պարենային կայունության ապահովման գործում։
